റിയാദ്: അന്താരാഷ്ട്ര വ്യാപാരത്തിന്റെ സുഗമമായ ഒഴുക്കിനും മേഖലയിലെ സുരക്ഷയും സ്ഥിരതയും ഉറപ്പാക്കുന്നതിനും സമുദ്ര ഗതാഗതത്തിന്റെ സുരക്ഷയും സ്വതന്ത്ര സഞ്ചാരവും ഉറപ്പാക്കേണ്ടത് അനിവാര്യമാണെന്ന് ഖത്തറും സൗദി അറേബ്യയും. അറേബ്യന് ഗള്ഫിലും ചെങ്കടലിലും പ്രത്യേക ശ്രദ്ധ നല്കേണ്ടതിന്റെ ആവശ്യകതയും ഇരുരാജ്യങ്ങളും വ്യക്തമാക്കി.
റിയാദില് ഖത്തര് പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിന് അബ്ദുറഹ്മാന് ബിന് ജാസിം അല് താനിയും സൗദി വിദേശകാര്യ മന്ത്രി പ്രിന്സ് ഫൈസല് ബിന് ഫര്ഹാന് ബിന് അബ്ദുല്ല അല് സൗദും നടത്തിയ കൂടിക്കാഴ്ചയിലാണ് ഇക്കാര്യം വ്യക്തമാക്കിയത്.
ഇരുരാജ്യങ്ങളും തമ്മിലുള്ള സഹകരണ ബന്ധങ്ങളും വിവിധ മേഖലകളില് അവ കൂടുതല് ശക്തിപ്പെടുത്തുന്നതിനും വികസിപ്പിക്കുന്നതിനുമുള്ള മാര്ഗങ്ങളും കൂടിക്കാഴ്ചയില് ചര്ച്ച ചെയ്തു. വിവിധ മേഖലകളിലെ ഏകോപനവും സംയുക്ത പ്രവര്ത്തനവും ശക്തിപ്പെടുത്തുന്നതിനെക്കുറിച്ചും ഇരുപക്ഷവും ആശയവിനിമയം നടത്തി.
പ്രാദേശിക മേഖലയിലെ ഏറ്റവും പുതിയ സംഭവവികാസങ്ങള്, സംഘര്ഷം കുറയ്ക്കുന്നതിനും പിരിമുറുക്കം നിയന്ത്രിക്കുന്നതിനും സുരക്ഷയും സ്ഥിരതയും ശക്തിപ്പെടുത്തുന്നതിനുമായി നടക്കുന്ന നയതന്ത്ര ശ്രമങ്ങള് എന്നിവയും ചര്ച്ചയായി. ഗാസയിലെയും അധിനിവേശ ഫലസ്തീന് പ്രദേശങ്ങളിലെയും പുതിയ സാഹചര്യങ്ങളും കൂടിക്കാഴ്ചയില് വിലയിരുത്തി.
നിലവിലെ സംഭവവികാസങ്ങളില് ഇരു രാജ്യങ്ങളും തമ്മിലുള്ള ഏകോപനവും കൂടിയാലോചനയും തുടരേണ്ടതിന്റെയും നിലപാടുകള് ഏകീകരിക്കേണ്ടതിന്റെയും പ്രാധാന്യം ഇരുപക്ഷവും ഊന്നിപ്പറഞ്ഞു. പ്രാദേശിക സുരക്ഷയും സ്ഥിരതയും ഉറപ്പാക്കുന്നതിനുള്ള ശ്രമങ്ങള് ശക്തിപ്പെടുത്തുകയാണ് ലക്ഷ്യമെന്ന് വ്യക്തമാക്കി.
തര്ക്കങ്ങള് നയതന്ത്ര മാര്ഗങ്ങളിലൂടെ പരിഹരിക്കുന്നതിനുള്ള ശ്രമങ്ങള്ക്ക് പിന്തുണ നല്കുന്നതായും ഖത്തറും സൗദിയും വ്യക്തമാക്കി. സംഘര്ഷങ്ങള് ഒഴിവാക്കുന്നതിനും സംഭാഷണത്തിന് മുന്ഗണന നല്കുന്നതിനുമായി പ്രാദേശികവും അന്തര്ദേശീയവുമായ ശ്രമങ്ങള് ഏകോപിപ്പിക്കേണ്ടതിന്റെ പ്രാധാന്യവും ഇരുപക്ഷവും ചൂണ്ടിക്കാട്ടി.
അറേബ്യന് ഗള്ഫിലും ചെങ്കടലിലും ഉള്പ്പെടെ സമുദ്ര ഗതാഗതത്തിന്റെ സുരക്ഷയും സ്വതന്ത്ര സഞ്ചാരവും ഉറപ്പാക്കേണ്ടതിന്റെ ആവശ്യകതയും ഇരുരാജ്യങ്ങളും ആവര്ത്തിച്ചു. അന്താരാഷ്ട്ര വ്യാപാരത്തിന്റെ തടസ്സമില്ലാത്ത ഒഴുക്ക് ഉറപ്പാക്കുന്നതിനും നിര്ണായകമായ സമുദ്രപാതകളുടെ സുരക്ഷ ശക്തിപ്പെടുത്തുന്നതിനും മേഖലയിലെ സ്ഥിരത കൈവരിക്കുന്നതിനും ഇത് അനിവാര്യമാണെന്ന് ഇരുപക്ഷവും വ്യക്തമാക്കി.
അതേസമയം, ഗാസയിലെ സംഘര്ഷം അവസാനിപ്പിക്കുന്നതിനായി അമേരിക്കന് പ്രസിഡന്റ് ഡൊണാള്ഡ് ട്രംപ് മുന്നോട്ടുവച്ച സമഗ്ര പദ്ധതിയുടെ പൂര്ണമായ നടപ്പാക്കലിനുള്ള റോഡ്മാപ്പ് ഇസ്രായേല് നിരസിച്ചതിനെ ഖത്തറും സൗദി അറേബ്യയും വീണ്ടും അപലപിച്ചു. ഐക്യരാഷ്ട്രസഭാ സുരക്ഷാ കൗണ്സില് പ്രമേയം 2803 അംഗീകരിച്ച റോഡ്മാപ്പിനോടുള്ള ഇസ്രായേലിന്റെ നിലപാടിനെയും ഫലസ്തീന് രാഷ്ട്രം സ്ഥാപിക്കുന്നതിനുള്ള എതിര്പ്പിനെയും ഇരുരാജ്യങ്ങളും അപലപിച്ചു.
