ദോഹ: ഖത്തറില് കുറഞ്ഞ വിലയില് ഗുണമേന്മയുള്ള ഷോപ്പിംഗ് എന്ന ആശയം വിജയകരമായി അവതരിപ്പിച്ച പ്രമുഖ റീട്ടെയില് ഗ്രൂപ്പായ ‘ഡേ ടു ഡെ’ രണ്ടാമത്തേതും ഏറ്റവും വലുതുമായ സ്റ്റോര് ഫെബ്രുവരി 13ന് വെള്ളിയാഴ്ച വൈകിട്ട് നാലു മണിക്ക് ഉദ്ഘാടനം ചെയ്യുമെന്ന് മാനേജ്മെന്റ് പ്രതിനിധികള് വാര്ത്താ സമ്മേളനത്തില് അറിയിച്ചു.
എട്ടായിരം ചതുരശ്ര മീറ്ററില് മൂന്ന് നിലകളിലായി വ്യാപിച്ചിരിക്കുന്ന പുതിയ ഫ്ളാഗ്ഷിപ്പ് സ്റ്റോര് മുഐതറിലെ ഫുരൂസിയയില് ആസ്പെയര് പാര്ക്കിന് എതിര്വശത്താണ് സ്ഥിതി ചെയ്യുന്നത്. അത്യാധുനിക സൗകര്യങ്ങളോടുകൂടിയ പുതിയ ശാഖ ജി സി സി രാജ്യങ്ങളിലുടനീളം പ്രവര്ത്തിക്കുന്ന ‘ഡേ ടു ഡെ’ ഗ്രൂപ്പിന്റെ 18-ാമത്തെ ശാഖയാണ്.
പ്രധാനപ്പെട്ട ലൊക്കേഷനില് ഖത്തറില് തങ്ങളുടെ സാന്നിധ്യം വിപുലീകരിക്കുന്നതില് അതിയായ സന്തോഷമുണ്ടെന്ന് ഡയറക്ടര് ഡോ. അബ്ദുല് സമദ്, മാനേജിംഗ് ഡയറക്ടര് മുഷ്തഫ പടയന്, ഡയറക്ടര്മാരായ നജീബ് എല്ലത്ത്, ബഷീര് എന്നിവര് വാര്ത്താ സമ്മേളനത്തില് പറഞ്ഞു. കുറഞ്ഞ വിലയില് ഗുണമേന്മയുള്ള ഉത്പന്നങ്ങള് നല്കുമെന്ന തങ്ങളുടെ പ്രതിബദ്ധതയുടെ തെളിവാണ് പുതിയ ശാഖയെന്നും അവര് കൂട്ടിച്ചേര്ത്തു.
ഗൃഹോപകരണങ്ങള്, സ്റ്റേഷനറി, സ്കൂള് സാധനങ്ങള്, സ്പോര്ട്സ് ഉത്പന്നങ്ങള്, വസ്ത്രങ്ങള്, കോസ്മെറ്റിക്സ് തുടങ്ങിയവ ഉള്പ്പെടെ നിരവധി ഉത്പന്നങ്ങള് 1 റിയാല് മുതല് 20 റിയാല് വരെ വിലയില് ലഭ്യമാക്കുന്ന വ്യത്യസ്ത ബിസിനസ് മാതൃകയിലൂടെ ‘ഡേ ടു ഡെ’ ശ്രദ്ധേയമായ സ്ഥാനം നേടിയിട്ടുണ്ട്. ഖത്തറിലെ ഓള്ഡ് എയര്പോര്ട്ട് മേഖലയിലാണ് ഈ നവീന വിലമാറ്റ ആശയം ആദ്യമായി അവതരിപ്പിച്ചത്.
പുതിയ ഫുരൂസിയ മുഐഥര് ശാഖയില് മൂന്ന് വിശാലമായ നിലകളിലായി വിപുലമായ ഉത്പന്ന നിര ഒരുക്കിയിട്ടുണ്ടെന്ന് കമ്പനി അറിയിച്ചു. ഉപഭോക്താക്കള്ക്ക് കൂടുതല് മെച്ചപ്പെട്ട ഷോപ്പിംഗ് അനുഭവം നല്കുന്നതിനൊപ്പം മൂല്യാധിഷ്ഠിത വിലനയം തുടര്ന്നും പാലിക്കുമെന്ന് അധികൃതര് വ്യക്തമാക്കി.
ഉദ്ഘാടന ദിവസം പ്രത്യേക ആഘോഷ പരിപാടികളും ഒരുക്കിയിട്ടുണ്ടെന്ന് മാനേജ്മെന്റ് പ്രതിനിധികള് അറിയിച്ചു. ഉപഭോക്താക്കളെ പുതിയ സ്റ്റോര് സന്ദര്ശിച്ച് ഉദ്ഘാടന ഓഫറുകള് പ്രയോജനപ്പെടുത്താന് സ്വാഗതം ചെയ്യുന്നതായും അവര് കൂട്ടിച്ചേര്ത്തു.
