ദോഹ: ആഭ്യന്തര മന്ത്രിയും ആഭ്യന്തര സുരക്ഷാ സേനയുടെ (ലെഖ്വിയ) കമാന്‍ഡറുമായ ശൈഖ് ഖലീഫ ബിന്‍ ഹമദ് ബിന്‍ ഖലീഫ അല്‍താനിയുടെ നേതൃത്വത്തില്‍ സംഘടിപ്പിച്ച ആദ്യ ദോഹ ഇന്റര്‍നാഷണല്‍ മ്യൂസിക് ആന്‍ഡ് ഡാന്‍സ് ഫെസ്റ്റിവല്‍ (ദോഹ ടാറ്റൂ) കതാറയില്‍ സമാപിച്ചു. ആഭ്യന്തരകാര്യങ്ങളിലെ സഹമന്ത്രി ശൈഖ് അബ്ദുല്‍ അസീസ് ബിന്‍ ഫൈസല്‍ ബിന്‍ മുഹമ്മദ് അല്‍താനി, ജര്‍മന്‍ ആഭ്യന്തര മന്ത്രി അലക്‌സാണ്ടര്‍ ഡോബ്രിന്റ് എന്നിവരും നിരവധി മുതിര്‍ന്ന ഉദ്യോഗസ്ഥരും ചടങ്ങില്‍ പങ്കെടുത്തു.
സൈനിക ബാന്‍ഡുകള്‍ അവതരിപ്പിച്ച മനോഹരമായ പ്രകടനങ്ങള്‍ പ്രേക്ഷകരില്‍ നിന്ന് വലിയ അഭിനന്ദനം നേടി. ഖത്തറിലെ ബാന്‍ഡുകളോടൊപ്പം സഹോദര രാജ്യങ്ങളിലെയും സൗഹൃദ രാജ്യങ്ങളിലെയും ബാന്‍ഡുകളും ഫെസ്റ്റിവലില്‍ പങ്കാളികളായി.
ഖത്തറിനെ പ്രതിനിധീകരിച്ച് പ്രതിരോധ മന്ത്രാലയം, ആഭ്യന്തര മന്ത്രാലയം, അമീരി ഗാര്‍ഡ്, ആഭ്യന്തര സുരക്ഷാ സേന (ലെഖ്വിയ) എന്നിവയുടെ ബാന്‍ഡുകള്‍ പങ്കെടുത്തു. ഒമാന്‍, ജോര്‍ദാന്‍, തുര്‍ക്കിയെ, കസാഖിസ്ഥാന്‍, യു കെ, യു എസ് എന്നിവിടങ്ങളില്‍ നിന്നുള്ള ബാന്‍ഡുകളും പരിപാടിയില്‍ അണിനിരന്നു.
അന്താരാഷ്ട്ര ”ടാറ്റൂ” ഫെസ്റ്റിവലുകളുടെ പാരമ്പര്യങ്ങളില്‍ നിന്ന് പ്രചോദനം ഉള്‍ക്കൊണ്ട പ്രകടനങ്ങള്‍ താളം, സംസ്‌കാരം, ഐക്യം എന്നിവ ആഘോഷിക്കുന്നതായിരുന്നു. സാംസ്‌കാരിക വിനിമയത്തിന്റെ ആത്മാവിനെയും അനുഭവങ്ങളുടെ വൈവിധ്യത്തെയും പ്രതിഫലിപ്പിക്കുന്ന, ക്രമബദ്ധമായ സൈനിക കലാപാനലുകളുടെ അന്തരീക്ഷത്തിലാണ് അവതരണങ്ങള്‍ അരങ്ങേറിയത്.
