ദോഹ: ഫുട്ബോള് ലോകകപ്പില് ഒരു മലയാളി സാന്നിധ്യം എന്നത് ഒരു കാലത്ത് സ്വപ്നം മാത്രമായിരുന്നുവെങ്കില് 2026 ഫിഫ ലോകകപ്പിനുള്ള ഖത്തര് ദേശീയ ടീമില് ഇടംനേടിയ തഹ്സീന് മുഹമ്മദ് ജംഷിദ് ആ സ്വപ്നത്തെ യാഥാര്ഥ്യമാക്കുന്നു. ഖത്തറിന്റെ 26 അംഗ ലോകകപ്പ് ടീമില് ഇടംപിടിച്ചതോടെ ലോകകപ്പ് ഫുട്ബോളില് പങ്കെടുക്കുന്ന ആദ്യ ഇന്ത്യന് വംശജനെന്ന ചരിത്രനേട്ടവും 19-കാരനായ തഹ്സീന്റെ പേരിലായി.
ഖത്തര് ഫുട്ബോളിന്റെ വളര്ച്ചയുടെ പ്രതീകമായ ആസ്പയര് അക്കാദമിയുടെ മൈതാനങ്ങളില് വളര്ന്ന തഹ്സീന്റെ വേരുകള് കേരളത്തിന്റെ വടക്കന് മണ്ണിലാണ്. തലശ്ശേരി സ്വദേശിയും കോഴിക്കോട് സര്വകലാശാല മുന് ഫുട്ബോള് താരവുമായ ജംഷിദിന്റെയും കണ്ണൂര് സ്വദേശിനിയായ ഷൈമയുടെയും മകനാണ് അദ്ദേഹം. ഫുട്ബോളിനോടുള്ള കുടുംബത്തിന്റെ സ്നേഹവും ഖത്തറിലെ ആധുനിക പരിശീലന സംവിധാനങ്ങളും ചേര്ന്നപ്പോഴാണ് ലോകകപ്പ് വേദിയിലേക്കുള്ള ഈ അപൂര്വ യാത്ര സാധ്യമായത്.
അല് ദുഹൈല് ക്ലബ്ബിനായി ഖത്തര് സ്റ്റാര്സ് ലീഗില് കളിക്കുന്ന തഹ്സീന് ചെറുപ്പം മുതല് തന്നെ ശ്രദ്ധ നേടിയ താരമാണ്. ഖത്തറിന്റെ അണ്ടര്-17, അണ്ടര്-19 ദേശീയ ടീമുകള്ക്കായി കളിച്ച അനുഭവവും അദ്ദേഹത്തിനുണ്ട്. ദേശീയ ടീമിലേക്കുള്ള തിരഞ്ഞെടുപ്പിനെക്കുറിച്ച് പ്രതികരിക്കവെ യുവ ദേശീയ ടീമുകളിലൂടെ കടന്നുവന്നതിനാല് ഈ അവസരം പ്രതീക്ഷിച്ചിരുന്നതാണെന്ന് തഹ്സീന് പ്രതികരിച്ചു.
തഹ്സീന്റെ ലോകകപ്പ് പ്രവേശനം ഒരു വ്യക്തിഗത നേട്ടം മാത്രമല്ല. വിദേശ രാജ്യങ്ങളില് വളരുന്ന ഇന്ത്യന് വംശജരായ യുവതലമുറയുടെ സാധ്യതകളുടെ തെളിവുകൂടിയാണത്. ലോകോത്തര പരിശീലനവും കൃത്യമായ വികസന പദ്ധതികളും ലഭിച്ചാല് ഇന്ത്യന് വേരുകളുള്ള താരങ്ങള്ക്കും ലോക ഫുട്ബോളിന്റെ ഏറ്റവും വലിയ വേദിയിലെത്താന് കഴിയുമെന്ന് തഹ്സീന്റെ കഥ വ്യക്തമാക്കുന്നു.
2022-ല് സ്വന്തം നാട്ടില് നടന്ന ലോകകപ്പില് നിരാശാജനക പ്രകടനം കാഴ്ചവെച്ചെങ്കിലും ഖത്തര് ഇത്തവണ പുതിയ പ്രതീക്ഷകളുമായാണ് അമേരിക്ക, കാനഡ, മെക്സിക്കോ എന്നിവിടങ്ങളിലായി നടക്കുന്ന ലോകകപ്പിലേക്ക് എത്തുന്നത്. ഏഷ്യന് കപ്പ് കിരീടം നിലനിര്ത്തിയ ടീമില് യുവതാരങ്ങള്ക്കും പരിചയസമ്പന്നര്ക്കും ഒരുപോലെ അവസരം നല്കിയിട്ടുണ്ട്. ആ പുതിയ തലമുറയുടെ മുഖങ്ങളിലൊന്നാണ് തഹ്സീന്.
ലോകകപ്പ് വേദിയില് തഹ്സീന് കളിക്കാന് അവസരം ലഭിച്ചാല് അത് ഖത്തര് ഫുട്ബോളിന്റെ ചരിത്രത്തിലെ ഒരു സുപ്രധാന നിമിഷമാകുന്നതോടൊപ്പം കേരളത്തിനും ഇന്ത്യയ്ക്കും അഭിമാന നിമിഷമാകും.
തലശ്ശേരിയിലെ ഒരു ഫുട്ബോള് കുടുംബത്തില് നിന്ന് ആരംഭിച്ച യാത്ര ഇന്ന് ലോകകപ്പിന്റെ മഹാവേദിയിലെത്തിയിരിക്കുന്നു. ലോകത്തിന്റെ കണ്ണുകള് പതിയുന്ന ആ പച്ചപ്പുല്ലില് തഹ്സീന് മുഹമ്മദ് ജംഷിദ് പന്ത് തട്ടുന്ന നിമിഷം, അത് ഒരു താരത്തിന്റെ സ്വപ്നസാക്ഷാത്കാരം മാത്രമല്ല; അതിര്ത്തികള് കടന്ന് ഉയര്ന്ന ഒരു മലയാളി വേരിന്റെ വിജയഗാഥ കൂടിയായിരിക്കും.
