ദോഹ: ഖത്തര് സന്ദര്ശിക്കുന്ന ബഹുകക്ഷി ഇന്ത്യന് പ്രതിനിധി സംഘം ശൂറ കൗണ്സിലിലെ ഖത്തരി പ്രമുഖരുമായും അക്കാദമിക്, തിങ്ക്-ടാങ്ക് സമൂഹത്തിലെ അംഗങ്ങളുമായും ആശയവിനിമയം നടത്തി. ഖത്തറിലെ ഇന്ത്യന് എംബസി പരിസരത്ത് മഹാത്മാഗാന്ധിക്ക് പുഷ്പാര്ച്ചന നടത്തിയാണ് പ്രതിനിധി സംഘം ദിനം ആരംഭിച്ചത്.
ആഗോളതലത്തില് സമാധാനത്തിന്റെയും അഹിംസയുടെയും സന്ദേശം പ്രചരിപ്പിച്ച ഗൗതമബുദ്ധന്റെയും ഗാന്ധിയുടെയും നാടാണ് ഇന്ത്യയെന്ന് അംഗങ്ങള് അനുസ്മരിച്ചു.
തുടര്ന്ന് ഇന്ത്യന് പ്രതിനിധി സംഘം ഖത്തറിലെ ശൂറ കൗണ്സില് സന്ദര്ശിക്കുകയും ശൂറ കൗണ്സില് ഡെപ്യൂട്ടി സ്പീക്കര് ഡോ. ഹംദ ബിന്ത് ഹസ്സന് അല് സുലൈത്തിയുടെ നേതൃത്വത്തിലുള്ള ഖത്തരി പ്രതിനിധി സംഘവുമായി കൂടിക്കാഴ്ച നടത്തുകയും ചെയ്തു. അതിര്ത്തി കടന്നുള്ള ഭീകരതയുടെ തുടര്ച്ചയായ ഭീഷണിയും ഇന്ത്യയില് സാമൂഹിക ഭിന്നത വിതയ്ക്കാനുള്ള ബോധപൂര്വമായ ശ്രമങ്ങളും പ്രതിനിധി സംഘം യോഗത്തില് ഊന്നിപ്പറഞ്ഞു.
ജമ്മു- കശ്മീര് കേന്ദ്രഭരണ പ്രദേശത്തെ സമാധാനവും വികസനവും തകര്ക്കാനുള്ള മനഃപൂര്വ ശ്രമമായി പഹല്ഗാമിലെ ഭീകരാക്രമണത്തെ അവര് അപലപിച്ചു. ഇന്ത്യ നടത്തിയ ഓപ്പറേഷന് സിന്ദൂര്, കൃത്യമായി ആസൂത്രണം ചെയ്തതും ലക്ഷ്യം വച്ചുള്ളതും ആനുപാതികമായി നടപ്പിലാക്കിയതുമാണെന്ന് അവര് എടുത്തുപറഞ്ഞു.
സംഘര്ഷങ്ങള് വര്ധിപ്പിക്കാതെ ഭീകരതയെ നേരിടാനുള്ള ഇന്ത്യയുടെ പ്രതിബദ്ധത ഇത് പ്രകടമാക്കുന്നു. ഖത്തര് പക്ഷം ഭീകരതയ്ക്കെതിരായ സ്വന്തം സീറോ ടോളറന്സ് നയത്തിന് ഊന്നല് നല്കി ഭീകരതയെ അപലപിക്കണമെന്ന് ആവശ്യപ്പെട്ടു.
മിഡില് ഈസ്റ്റ് കൗണ്സില് ഫോര് ഗ്ലോബല് അഫയേഴ്സിലെ അക്കാദമിക്, തിങ്ക്-ടാങ്ക് സമൂഹവുമായി പ്രതിനിധി സംഘം ആശയവിനിമയം നടത്തുകയും ഭീകരതയെക്കുറിച്ചുള്ള ഇന്ത്യയുടെ സീറോ ടോളറന്സ് നയത്തെക്കുറിച്ചും തീവ്രവാദികളെയും അവരുടെ പിന്തുണക്കാരെയും അവസാനിപ്പിക്കേണ്ടതിന്റെ ആവശ്യകതയെക്കുറിച്ചും വിശദീകരിക്കുകയും ചെയ്തു. ഇന്ത്യയുടെ നിലപാട് സംബന്ധിച്ച തങ്ങളുടെ ധാരണ പങ്കാളികള് പ്രകടിപ്പിച്ചു.
ഖത്തറിലെ പ്രമുഖ പത്രങ്ങളായ അല് ശര്ഖ്, പെനിന്സുല എന്നിവയുടെ എഡിറ്റോറിയല് ടീമുമായും പ്രതിനിധി സംഘം സംവദിച്ചു, പഹല്ഗാം ഭീകരാക്രമണത്തെ തുടര്ന്നുള്ള സംഭവവികാസങ്ങളെക്കുറിച്ചുള്ള ഇന്ത്യയുടെ വീക്ഷണങ്ങളും അതിര്ത്തി കടന്നുള്ള ഭീകരതയെ ചെറുക്കാനുള്ള നയവും അറിയിച്ചു.
