Connect with us

GCC News

അറബി ആംഗ്യ ഭാഷയുടെ ഏകീകരണത്തിനായി സഞ്ചരിച്ച് മുഹമ്മദ് ഇക്ബാല്‍

Published

on


ദുബൈ: ആംഗ്യ ഭാഷയുടെ ഏകീകരണത്തിനായുള്ള സഞ്ചാരത്തിലും പഠനത്തിലുമാണ് അസ്സാം സ്വദേശി മുഹമ്മദ് ഇക്ബാല്‍. ആംഗ്യ ഭാഷയുടെ അറബിയിലുള്ള അടയാളങ്ങളുമായി അദ്ദേഹം പുറത്തിറക്കിയ പുസ്തകം ഏറെ ശ്രദ്ധിക്കപ്പെട്ടിരുന്നു. വിശുദ്ധ ഖുര്‍ആന്‍ കേള്‍വി പരിമിതര്‍ക്ക് പഠിക്കാന്‍ ഉപകാരപ്പെടുന്ന രീതിയില്‍ പുറത്തിറക്കിയ പുസ്തകത്തിന് പത്തോളം ഭാഷകളില്‍ പതിപ്പുകളിറങ്ങിയിട്ടുണ്ട്.

പഠന, ബോധന മേഖലകളില്‍ ആധുനികമായ സംവിധാനങ്ങള്‍ എല്ലായിടങ്ങളിലും ഉപയോഗിക്കപ്പെടുന്നുണ്ടെങ്കിലും ആംഗ്യ ഭാഷയ്ക്ക് ഏകീകരണമില്ലെന്നാണ് ഇക്ബാലിന്റെ കണ്ടെത്തല്‍. വിവിധ സ്ഥലങ്ങളിലും രാജ്യങ്ങളിലും വ്യത്യസ്ഥ രീതിയിലാണ് ആംഗ്യങ്ങള്‍ കാണിക്കുന്നത്. ഇത് പ്രാദേശിക തലത്തിലായാലും വിദേശ തലത്തിലായാലും വ്യത്യാസപ്പെട്ടിരിക്കയാണെന്ന് മുഹമ്മദ് ഇക്ബാല്‍ പറയുന്നു.

കേരളത്തിലെ വിവിധ സ്ഥാപനങ്ങളിലെ ആംഗ്യഭാഷാധ്യാപകര്‍ ഇക്കാര്യത്തില്‍ ജാഗ്രത കാണിക്കണമെന്ന അഭിപ്രായവും മുഹമ്മദ് ഇക്ബാല്‍ ഉയര്‍ത്തുന്നുണ്ട്. ബധിരര്‍ക്കുള്ള ഖുര്‍ആന്‍ പഠനത്തിന്റെ അന്വേഷണങ്ങളുമായി ജി സി സി രാജ്യങ്ങളിലെല്ലാം മുഹമ്മദ് ഇക്ബാല്‍ സന്ദര്‍ശനം നടത്തിയിട്ടുണ്ട്. ഇവിടങ്ങളിലെ വിദ്യാഭ്യാസ പ്രവര്‍ത്തകരുമായും അധികൃതരുമായും അദ്ദേഹം ചര്‍ച്ചകള്‍ നടത്തിയിട്ടുണ്ട്. അറബി ഭാഷയില്‍ തന്നെ ഒരേ വസ്തുക്കള്‍ക്ക് വ്യത്യസ്ഥമായ ആംഗ്യ ഭാഷയാണ് വിവിധ സ്ഥലങ്ങളില്‍ ഉപയോഗിക്കുന്നതെന്ന് അദ്ദേഹം തെളിവു സഹിതം വിവരിക്കുകയാണ്. ഇങ്ങനെ വ്യത്യസ്ഥമായ രീതിയില്‍ ചിഹ്നങ്ങളും ആംഗ്യങ്ങളും പഠിപ്പിക്കുന്നത് കേള്‍വി പരിമിതര്‍ക്ക് പ്രയാസകരമാവുമെന്നാണ് മുഹമ്മദ് ഇക്ബാലിന്റെ അഭിപ്രായം.

അറബി ആംഗ്യഭാഷയുടെ ആധികാരികാരികതയും ഏകീകരണവും ലക്ഷ്യമാക്കിയുള്ള തന്റെ പ്രവര്‍ത്തനങ്ങള്‍ വിജയത്തിലെത്തിക്കും വരെ തുടരുമെന്നാണ് ഇദ്ദേഹം പറയുന്നത്. അസ്സാം സ്വദേശിയായ മുഹമ്മദ് ഇക്ബാല്‍ നിലവില്‍ കോഴിക്കോട്ടാണ് താമസിക്കുന്നത്. നിരവധി ഭാഷകളില്‍ പ്രാവീണ്യമുള്ള ഇദ്ദേഹം സാമൂഹിക ക്ഷേമ പ്രവര്‍ത്തനങ്ങളിലും സജീവമാണ്.

Advertisement

error: Content is protected !!