ദുബൈ: വെള്ളിയാഴ്ചത്തെ അവധി മാറ്റി പുതിയ വാരാന്ത്യത്തിലേക്ക് യു എ ഇ. വെള്ളിയാഴ്ച ഉച്ചകഴിഞ്ഞ്, ശനി, ഞായര് എന്നീ ദിവസങ്ങളില് പുതിയ വാരാന്ത്യമായി മാറുന്നതായാണ് പ്രഖ്യാപനം വന്നിരിക്കുന്നത്. അബുദാബി, ദുബായ് സര്ക്കാരുകളും പുതിയ ഘടന പിന്തുടരുമെന്ന് പ്രഖ്യാപിച്ചിട്ടുണ്ട്.
തിങ്കള് മുതല് വ്യാഴം വരെയുള്ള പ്രവൃത്തി ദിവസങ്ങള് ഇപ്പോള് രാവിലെ 7.30 ന് ആരംഭിച്ച് ഉച്ചകഴിഞ്ഞ് 3.30 നും വെള്ളിയാഴ്ച പ്രവൃത്തി സമയം 7.30 മുതല് 12.00 വരെയും അവസാനിക്കുന്ന രീതിയാണ് നിലവില് വരിക.
എമിറേറ്റുകളില് ഉടനീളം ഉച്ചയ്ക്ക് 1.15 മുതല് വെള്ളിയാഴ്ച പ്രഭാഷണങ്ങളും പ്രാര്ത്ഥനകളും നടക്കും. സര്ക്കാര് ജീവനക്കാര്ക്ക് വെള്ളിയാഴ്ചകളില് വീട്ടിലിരുന്ന് ജോലി ചെയ്യാനുള്ള ക്രമീകരണങ്ങള് നടത്താനും അവരുടെ ജോലി സമയം ഫ്ളക്സിടൈം അടിസ്ഥാനത്തില് ക്രമീകരിക്കാനും സൗകര്യമുണ്ട്. തൊഴില്,ജീവിത സന്തുലിതാവസ്ഥ വര്ധിപ്പിക്കുന്നതിനും സാമൂഹിക ക്ഷേമം മെച്ചപ്പെടുത്തുന്നതിനുമുള്ള ശ്രമങ്ങളുടെ ഭാഗമായാണ് വിപുലമായ വാരാന്ത്യമെന്ന് യു എ ഇ ഗവണ്മെന്റ് മീഡിയ ഓഫീസ് അറിയിച്ചു.
ആഗോള സാമ്പത്തിക മേഖലയില് രാജ്യത്തെ മികച്ച രീതിയില് യോജിപ്പിക്കാന് പുതിയ പ്രവൃത്തി സഹായിക്കുമെന്നാണ് വിലയിരുത്തല്. ശനി,ഞായര് വാരാന്ത്യത്തെ പിന്തുടരുന്ന രാജ്യങ്ങളുമായുള്ള സുഗമമായ സാമ്പത്തിക, വ്യാപാര, സാമ്പത്തിക ഇടപാടുകള് ഇത് ഉറപ്പാക്കും.
