ദോഹ: ഹമദ് മെഡിക്കല്‍ കോര്‍പ്പറേഷനില്‍ (എച്ച് എം സി) എന്‍ഡോവ്മെന്റ് അധിഷ്ഠിത ഡയാലിസിസ് പദ്ധതിയില്‍ നിന്ന് നാല് വര്‍ഷത്തിനകം 5,043 രോഗികള്‍ക്ക് പ്രയോജനം ലഭിച്ചു. 2020 മുതല്‍ 2024 വരെയുള്ള കണക്കാണിത്.
എന്‍ഡോവ്മെന്റ്സ് (ഔഖാഫ്) മന്ത്രാലയത്തിലെ ജനറല്‍ ഡയറക്ടറേറ്റ് ഓഫ് എന്‍ഡോവ്മെന്റിന് കീഴിലുള്ള ഹെല്‍ത്ത്കെയര്‍ എന്‍ഡോവ്മെന്റ് ഫണ്ടിന്റെ പിന്തുണയോടെയാണ് പദ്ധതി നടപ്പാക്കിയത്.
ഹെല്‍ത്ത്കെയര്‍ എന്‍ഡോവ്മെന്റ് ഫണ്ടിന്റെ പിന്തുണയോടെ ഡയാലിസിസ് പദ്ധതി ആരോഗ്യ സംരക്ഷണവും ജീവകാരുണ്യ മേഖലകളും തമ്മിലുള്ള പങ്കാളിത്തത്തിന്റെ മുന്‍നിര മാനുഷിക മാതൃകയായി വര്‍ത്തിക്കുന്നുവെന്നും ഖത്തറിലെ ആയിരക്കണക്കിന് വൃക്ക തകരാറുള്ള രോഗികളുടെ ജീവിതനിലവാരം മെച്ചപ്പെടുത്തുന്നതിന് ഗണ്യമായ സംഭാവന നല്‍കിയിട്ടുണ്ടെന്നും ഔഖാഫ് മന്ത്രാലയം വാര്‍ത്താ കുറിപ്പില്‍ പറഞ്ഞു.
താഴ്ന്ന വരുമാനക്കാരായ രോഗികള്‍ക്ക് ഡയാലിസിസ് സേവനങ്ങള്‍ നല്‍കുക, അവരുടെ ജീവിത നിലവാരം മെച്ചപ്പെടുത്തുക, അവരുടെയും കുടുംബങ്ങളുടെയും സാമ്പത്തിക ഭാരം ലഘൂകരിക്കുക എന്നിവയാണ് പദ്ധതിയുടെ ലക്ഷ്യമെന്ന് എച്ച് എം സിയിലെ സോഷ്യല്‍ സര്‍വീസ് ഡിപ്പാര്‍ട്ട്മെന്റ് എക്സിക്യൂട്ടീവ് ഡയറക്ടര്‍ ബഷായര്‍ അല്‍ റാഷീദ് പറഞ്ഞു.
ആവശ്യമുള്ള രോഗികള്‍ക്ക് മെഡിക്കല്‍ ഉപകരണങ്ങള്‍, സാധനങ്ങള്‍, ചികിത്സാ ചെലവുകള്‍ എന്നിവ നല്‍കുന്നതിന് എന്‍ഡോവ്മെന്റ് പിന്തുണ സഹായകരമാണെന്ന് അവര്‍ ചൂണ്ടിക്കാട്ടി, ഇത് സേവനങ്ങളുടെ തുടര്‍ച്ചയും ഗുണനിലവാരവും ശക്തിപ്പെടുത്തുകയും ഡയാലിസിസ് സെഷനുകള്‍ക്ക് വര്‍ധിച്ചുവരുന്ന ആവശ്യം നിറവേറ്റാന്‍ കോര്‍പ്പറേഷനെ പ്രാപ്തമാക്കുകയും ചെയ്തു.
ആരോഗ്യസ്ഥിതി, സാമൂഹിക സാഹചര്യങ്ങള്‍, വരുമാന നിലവാരം, ആവശ്യമായ ഡയാലിസിസ് സെഷനുകളുടെ എണ്ണം എന്നിവ പരിഗണിച്ച്, ബന്ധപ്പെട്ട അധികാരികളുമായി ഏകോപിപ്പിച്ച് വ്യക്തമായ മാനദണ്ഡങ്ങള്‍ക്കനുസൃതമായാണ് ഗുണഭോക്തൃ തെരഞ്ഞെടുപ്പ് നടത്തുന്നതെന്ന് അല്‍ റാഷിദ് വിശദീകരിച്ചു.
രോഗികളുടെ മാനസിക ക്ഷേമം മെച്ചപ്പെടുത്തുന്നതിലൂടെയും കുടുംബങ്ങളിലും സമൂഹങ്ങളിലും അവരുടെ റോളുകള്‍ പുന:രാരംഭിക്കാന്‍ പ്രാപ്തരാക്കുന്നതിലൂടെയും പദ്ധതി ഗണ്യമായ മാനുഷിക സ്വാധീനം ചെലുത്തിയിട്ടുണ്ടെന്നും അവര്‍ കൂട്ടിച്ചേര്‍ത്തു. രോഗികള്‍ക്കും കുടുംബങ്ങള്‍ക്കും മാനസിക പിന്തുണയും ആരോഗ്യ വിദ്യാഭ്യാസവും ഉള്‍പ്പെടുത്തുന്നതിനായി പദ്ധതിയുടെ വ്യാപ്തി വികസിപ്പിക്കുന്നതിനുള്ള നിലവിലെ പഠനം നടക്കുന്നുണ്ടെന്നും അവര്‍ സ്ഥിരീകരിച്ചു.
രോഗികള്‍ക്ക് സാമ്പത്തിക ബാധ്യതയില്ലാതെ ചികിത്സ നല്‍കുന്നതിലൂടെയും ഗുണനിലവാരമുള്ള മെഡിക്കല്‍ സേവനങ്ങളിലേക്കുള്ള പ്രവേശനം വര്‍ധിപ്പിക്കുന്നതിലൂടെയും നല്ല ആരോഗ്യവും ക്ഷേമവും ഉറപ്പാക്കുന്നതില്‍ ശ്രദ്ധ കേന്ദ്രീകരിക്കുന്ന സുസ്ഥിര വികസനത്തിന്റെ മൂന്നാമത്തെ ലക്ഷ്യം കൈവരിക്കുന്നതിന് പദ്ധതി സംഭാവന ചെയ്യുന്നുണ്ടെന്ന് അല്‍ റാഷിദ് കൂട്ടിച്ചേര്‍ത്തു.
