ഇസ്താംബുള്: സൗദി അറേബ്യയുടെ പടിഞ്ഞാറന് തീരപ്രദേശമായ യാമ്പു ഗവര്ണറേറ്റിലും തെക്കുപടിഞ്ഞാറന് ജിസാന് പ്രവിശ്യയിലും ‘സാധ്യതയുള്ള ഭീഷണി’ ഉണ്ടെന്ന് മുന്നറിയിപ്പ് നല്കി ശനിയാഴ്ച പുലര്ച്ചെ അധികൃതര് ജനങ്ങളോട് ജാഗ്രത പാലിക്കാന് നിര്ദേശിച്ചു. പിന്നീട് സ്ഥിതിഗതികള് സാധാരണ നിലയിലായതായി അറിയിച്ച് മുന്നറിയിപ്പ് പിന്വലിച്ചു.
സൗദി സിവില് ഡിഫന്സിന്റെ അറിയിപ്പില്, ദേശീയ എര്ളി വാണിംഗ് പ്ലാറ്റ്ഫോം ശനിയാഴ്ച ചെങ്കടല് തീരത്തെ യന്ബു ഗവര്ണറേറ്റിനായി മൂന്ന് മുന്നറിയിപ്പുകള് പുറപ്പെടുവിച്ചതായി വ്യക്തമാക്കി. എന്നാല് ഭീഷണിയുടെ സ്വഭാവം എന്താണെന്ന് അധികൃതര് വെളിപ്പെടുത്തിയില്ല.
തുടര്ന്ന് പുറത്തിറക്കിയ അറിയിപ്പില് യാമ്പു മേഖലയിലെ ഭീഷണി അവസാനിച്ചതായി സിവില് ഡിഫന്സ് അറിയിച്ചു.
പിന്നീട് ജിസാന് പ്രവിശ്യയ്ക്കായും ദേശീയ എര്ളി വാണിംഗ് പ്ലാറ്റ്ഫോം സമാന മുന്നറിയിപ്പ് പുറപ്പെടുവിച്ചു. പിന്നീട് ജിസാനിലെയും ഭീഷണി അവസാനിച്ചതായി അധികൃതര് സ്ഥിരീകരിച്ചു.
സംഭവവുമായി ബന്ധപ്പെട്ട് ആളപായമോ നാശനഷ്ടങ്ങളോ റിപ്പോര്ട്ട് ചെയ്തിട്ടില്ല.
അതേസമയം, ചെങ്കടലിലൂടെ സഞ്ചരിച്ചിരുന്ന വാണിജ്യ കപ്പലുകളെ ഹൂത്തി വിമതര് ലക്ഷ്യമിട്ടതിനെ തുടര്ന്ന് യെമനിലെ പടിഞ്ഞാറന് ഹുദൈദ പ്രവിശ്യയിലെ നിയമാനുസൃത ഹൂത്തി സൈനിക കേന്ദ്രങ്ങള്ക്കെതിരെ ആനുപാതികമായ സൈനിക നടപടി സ്വീകരിച്ചതായി സൗദി നേതൃത്വത്തിലുള്ള സഖ്യസേന വെള്ളിയാഴ്ച രാത്രി അറിയിച്ചു.
ഹുദൈദ തുറമുഖത്തെ ആക്രമിച്ചിട്ടില്ലെന്നും യെമനിലെ എല്ലാ തുറമുഖങ്ങളും സമുദ്ര ഗതാഗതത്തിനായി തുറന്നുകിടക്കുകയാണെന്നും സഖ്യസേന വ്യക്തമാക്കി. അതേസമയം, കമറാന് ദ്വീപിലും ഹുദൈദയിലെ ടെലികമ്മ്യൂണിക്കേഷന് കേന്ദ്രങ്ങളിലും സൗദി വ്യോമാക്രമണം നടത്തിയെന്നാരോപിച്ച് ഹൂത്തി വിഭാഗം രംഗത്തെത്തി.
ചെങ്കടലിലും ബാബ് അല്-മന്ദബ് കടലിടുക്കിലും സൗദിയുമായി ബന്ധപ്പെട്ട കപ്പലുകള്ക്ക് വിലക്ക് ഏര്പ്പെടുത്തുമെന്ന് ഹൂത്തികള് ഭീഷണിപ്പെടുത്തിയതോടെയാണ് ഇരുപക്ഷങ്ങളും തമ്മിലുള്ള സംഘര്ഷം രൂക്ഷമായത്.
സൗദിയിലേക്കുള്ള സമുദ്രഗതാഗതത്തിന് തിങ്കളാഴ്ച മുതല് വിലക്ക് ഏര്പ്പെടുത്തുന്നതായി ഹൂത്തികള് പ്രഖ്യാപിച്ചതിനെ തുടര്ന്ന്, ബാബ് അല്-മന്ദബ് കടലിടുക്കിലൂടെ സഞ്ചരിക്കുന്ന കപ്പലുകളുടെ സുരക്ഷ ഉറപ്പാക്കാന് ശക്തവും കര്ശനവുമായ നടപടികള് സ്വീകരിക്കുമെന്ന് സൗദി നേതൃത്വത്തിലുള്ള സഖ്യസേന പ്രഖ്യാപിച്ചിരുന്നു.
