ദോഹ: മെയ് 30 വരെ ദോഹ എക്സിബിഷന് ആന്റ് കണ്വെന്ഷന് സെന്ററില് നടക്കുന്ന പ്രോജക്ട് ഖത്തറിന്റെ 20-ാമത് എഡിഷനില് 40 ഇന്ത്യന്, ഇന്ത്യന് ഉടമസ്ഥതയിലുള്ള കമ്പനികള് പങ്കെടുക്കുന്നു. നിര്മ്മാണ, നിര്മ്മാണ സാമഗ്രികളുടെ മേഖലയില് ഖത്തറിലെ ഏറ്റവും വലുതും പ്രമുഖവുമായ വ്യാപാര പ്രദര്ശനങ്ങളിലൊന്നാണിത്.
ഖത്തറിലെ ഇന്ത്യന് അംബാസഡര് വിപുല് എക്സിബിഷനില് ഇന്ത്യന് പവലിയന്റെയും ഇന്ത്യന് സ്റ്റാന്ഡുകളുടെയും ഉദ്ഘാടനം നിര്വഹിച്ചു, ഖത്തറില് നിന്നുള്ള വ്യവസായങ്ങളും ഇന്ത്യന് പവലിയനുകളും സന്ദര്ശിക്കാനും സഹകരണം ഉറപ്പുവരുത്താനും അദ്ദേഹം ആവശ്യപ്പെട്ടു.
ഇന്ത്യാ ഗവണ്മെന്റിന്റെ സൂക്ഷ്മ, ചെറുകിട, ഇടത്തരം വ്യവസായ മന്ത്രാലയത്തിന്റെ നേതൃത്വത്തില് 20 ഇന്ത്യന് കമ്പനികളുടെ പ്രതിനിധി സംഘം ഇന്ത്യന് ചേമ്പേഴ്സ് ഓഫ് കൊമേഴ്സ് ആന്ഡ് ഇന്ഡസ്ട്രിയാണ് (ഫിക്കി) ഏകോപിപ്പിച്ചത്. ഖത്തറിലെ ഇന്ത്യന് ബിസിനസ് ആന്ഡ് പ്രൊഫഷണല്സ് കൗണ്സിലും കേരള ബിസിനസ് ഫോറവും ഇന്ത്യന് എക്സിബിറ്റര്മാരെ ഏകോപിപ്പിക്കുന്നതില് പങ്കുവഹിക്കുന്നു.
നിര്മ്മാണ സാമഗ്രികള്, എം ഇ പി സേവനങ്ങള്, വാസ്തുവിദ്യാ രൂപകല്പന എന്നിവയുള്പ്പെടെ വ്യത്യസ്ത മേഖലകള് ഉള്പ്പെടുന്നതാണ് ഇന്ത്യന് സ്റ്റാന്ഡുകളും ബൂത്തുകളും. എക്സിബിഷനില് പങ്കെടുക്കുന്ന ഇന്ത്യയില് നിന്നുള്ള എക്സിബിറ്ററുകളും കമ്പനികളും അനലിറ്റിക്സ്, എഐ അടിസ്ഥാനമാക്കിയുള്ള ഡിജിറ്റല് ലോജിസ്റ്റിക്സ് സൊല്യൂഷനുകള്, സെറാമിക് ടൈലുകള് ആന്റ് ഗ്രാനൈറ്റ്, വെല്ഡിംഗ് ഉപഭോഗവസ്തുക്കള്, ഗ്യാസ് ഉപകരണങ്ങള്, ഓക്സിഫ്യൂവല് ഉത്പന്ന നിര്മ്മാണം, കെട്ടിട വ്യവസായത്തിനായുള്ള ആക്സസ് പാനലുകള്, സ്റ്റീല് തുടങ്ങിയവയാണ് അവതരിപ്പിക്കുന്നത്.
പ്രോജക്ട് ഖത്തര് പോലുള്ള പ്രദര്ശനങ്ങള് ഇരു രാജ്യങ്ങളും തമ്മിലുള്ള ഉഭയകക്ഷി വ്യാപാരവും വാണിജ്യവും കൂടുതല് വര്ധിപ്പിക്കും. 2023-24ല് 14 ബില്യണ് യു എസ് ഡോളറായിരുന്നു ഇന്ത്യ- ഖത്തര് വ്യാപാരം.
