കെയ്റോ: അറബ് ലീഗ് ആസ്ഥാനത്ത് നടന്ന 41-ാമത് അറബ് നീതിന്യായ മന്ത്രിമാരുടെ കൗണ്സിലില് ഖത്തര് പങ്കെടുത്തു.
ഖത്തര് പ്രതിനിധി സംഘത്തെ നീതിന്യായ മന്ത്രിയും മന്ത്രിസഭാ കാര്യങ്ങളുടെ സഹമന്ത്രിയുമായ ഇബ്രാഹിം ബിന് അലി ബിന് ഈസ അല് ഹസന് അല് മുഹന്നാദിയാണ് നയിച്ചത്.
അറബ് രാജ്യങ്ങള് തമ്മിലുള്ള നിയമ സഹകരണം ശക്തിപ്പെടുത്താനുള്ള ഖത്തറിന്റെ പ്രതിബദ്ധത അല് മുഹന്നദി തന്റെ പ്രസംഗത്തില് ഉറപ്പിച്ചു. ഭാവി തലമുറകള്ക്കായി ദീര്ഘകാല നീതി ഉറപ്പാക്കാന് ലക്ഷ്യമിട്ടുള്ള ഖത്തറിന്റെ പദ്ധതികളെക്കുറിച്ചും അദ്ദേഹം വിശദീകരിച്ചു. നിക്ഷേപ നിയമനിര്മ്മാണം, പുതുതായി ഉയര്ന്നുവരുന്ന സാങ്കേതികവിദ്യകള്, ഗവര്ണന്സ്, തര്ക്കപരിഹാര സംവിധാനം എന്നിവയില് പ്രത്യേക ശ്രദ്ധ പതിപ്പിച്ച് അദ്ദേഹം വ്യക്തമാക്കി.
നിക്ഷേപങ്ങളെ പിന്തുണയ്ക്കുന്നതില് ന്യായവ്യവസ്ഥയുടെ നിര്ണായക പങ്ക് അദ്ദേഹം വ്യക്തമാക്കി. സാമൂഹിക നീതി, സമാധാനം, സുരക്ഷ, മനുഷ്യാവകാശങ്ങള് എന്നിവ പ്രോത്സാഹിപ്പിക്കുന്നതില് മാര്ഗരേഖയായ ‘ദോഹ പൊളിറ്റിക്കല് ഡിക്ലറേഷന്’ 2025-ലെ രണ്ടാം ലോക സാമൂഹിക വികസന ഉച്ചകോടി ദോഹയില് അംഗീകരിക്കപ്പെട്ടതില് അദ്ദേഹം പ്രത്യേകമായി അഭിനന്ദനങ്ങള് പ്രകടിപ്പിച്ചു.
അന്താരാഷ്ട്ര മാനവീയ നിയമവുമായി ബന്ധപ്പെട്ട സ്ഥിരം അറബ് കമ്മിറ്റിയുടെ രൂപീകരണത്തിന് ഖത്തര് നല്കിയ നിര്ദേശത്തെ വികസിപ്പിക്കുന്നതില് സഹകരിച്ച അറബ് ലീഗിനും വിവിധ ദേശീയ കമ്മിറ്റികള്ക്കും അല് മുഹന്നദി നന്ദി രേഖപ്പെടുത്തി. ഈ സംരംഭം അറബ് സംയുക്ത പ്രവര്ത്തനത്തിലെ ചരിത്രഘട്ടമാണെന്നും സംഘര്ഷപ്രദേശങ്ങളില് നീതിയും മനുഷ്യ അഭിമാനവും സംരക്ഷിക്കാന് അറബ് ലോകത്തിന് ഐക്യമായ നിയമ ശബ്ദം നല്കുന്നതാണെന്നും അദ്ദേഹം ചൂണ്ടിക്കാട്ടി.
സമ്മേളനത്തില് ഭീകരവാദത്തിനെതിരായ അറബ് ഉടമ്പടി, ഭീകരവാദ ധനസഹായം തടയുന്നതിനുള്ള അറബ് ഉടമ്പടി, സൈബര് കുറ്റകൃത്യങ്ങളുമായി ബന്ധപ്പെട്ട അറബ് ഉടമ്പടി, അഴിമതിവിരുദ്ധ അറബ് ഉടമ്പടി എന്നിവ ഉള്പ്പെടെയുള്ള നിരവധി നിയമ- നിയമനിര്മ്മാണ വിഷയങ്ങള് ചര്ച്ച ചെയ്തു.
വിദ്വേഷ പ്രസംഗങ്ങള്, അറബ് രാജ്യങ്ങളിലെ അഭയാര്ഥികളുടെ അവസ്ഥ, സായുധ സംഘര്ഷങ്ങളില് കുട്ടികളെ ചേര്ക്കുന്നതില് നിന്ന് സംരക്ഷണം തുടങ്ങിയ വിഷയങ്ങളുമായി ബന്ധപ്പെട്ട അറബ് മാതൃകാ നിയമങ്ങളുടെയും കരടുകള് അവലോകനം ചെയ്തു.
മന്ത്രിമാര് അറബ് സഹകരണത്തെ മെച്ചപ്പെടുത്തുന്നതിനുള്ള നടപടികളും ചര്ച്ച ചെയ്തു. അതില് അറബ് നീതിന്യായ, ആഭ്യന്തര മന്ത്രാലയങ്ങള് തമ്മിലുള്ള ഏകോപനം, അറബ് പ്രായോഗിക നിയമശാസ്ത്ര മികവിനുള്ള പുരസ്കാരം സൃഷ്ടിക്കല്, അറബ് നീതിന്യായ മന്ത്രിമാരുടെ എക്സിക്യൂട്ടീവ് ഓഫിസിന്റെ 74-ാമത് യോഗത്തിലെ ശുപാര്ശകളുടെ അവലോകനം എന്നിവയും ഉള്പ്പെട്ടു.
