ദോഹ: ഡിസംബര് 26 മുതല് 30 വരെ ലോകത്തിലെ മുന്നിര ചെസ് താരങ്ങളെ ‘ഗ്ലോബല് സ്പോര്ട്സ് ക്യാപിറ്റല്’ ആയ ദോഹയിലേക്ക് ആകര്ഷിക്കുന്ന ഫിഡെ വേള്ഡ് റാപിഡ് ആന്ഡ് ബ്ലിറ്റ്സ് ചാമ്പ്യന്ഷിപ്പ് 2025 സംഘടിപ്പിക്കാന് തങ്ങള് പൂര്ണ സജ്ജമാണെന്ന് ഖത്തര് ചെസ് അസോസിയേഷന് വ്യക്തമാക്കി.
ക്യു സി എ പ്രസിഡന്റ് കൂടിയായ സംഘാടക സമിതി ചെയര്മാന് മുഹമ്മദ് അഹമ്മദ് അല്-മുദാഹ്ക, ക്യു സി എ എക്സിക്യൂട്ടീവ് ഡയറക്ടറും ടൂര്ണമെന്റ് ഡയറക്ടറുമായ ഹമദ് മുഹമ്മദ് അല്-തമീമിയോടൊപ്പം ഉയര്ന്ന പ്രൊഫൈലുള്ള ഈ ചാമ്പ്യന്ഷിപ്പ് ഖത്തര് യൂണിവേഴ്സിറ്റി സ്പോര്ട്സ് ആന്ഡ് ഇവന്റ്സ് കോംപ്ലക്സില് നടക്കുമെന്ന് അറിയിച്ചു.
റാപിഡ്, ബ്ലിറ്റ്സ് ഫോര്മാറ്റുകളിലായി ഓപ്പണ് വിഭാഗത്തിലും വനിതാ വിഭാഗത്തിലും മത്സരങ്ങള് ഉള്പ്പെടുന്ന പരിപാടിയില്, മൊത്തം ഒരു മില്യണിലധികം പൗണ്ട് സമ്മാനത്തുക ഉണ്ടായിരിക്കും.
ഫിഡെയുടെ കണക്കുകള് പ്രകാരം, റാപിഡ് ഓപ്പണ് മത്സരത്തിനായി 230 താരങ്ങളും ബ്ലിറ്റ്സ് ഓപ്പണ് മത്സരത്തിനായി 233 താരങ്ങളും രജിസ്റ്റര് ചെയ്തിട്ടുണ്ട്.
മത്സരങ്ങളില് 360-ലധികം താരങ്ങള് പങ്കെടുക്കും. നിലവിലെ ലോക ചാമ്പ്യന് ഗുകേഷ് ഡിയും മുന് ലോക ചാമ്പ്യന് മാഗ്നസ് കാര്ല്സനും നേതൃത്വം നല്കുന്ന മത്സരപ്പട്ടിക ആരാധകരില് വലിയ ആകാംക്ഷ സൃഷ്ടിച്ചിട്ടുണ്ട്.
കഴിഞ്ഞ വര്ഷം ന്യൂയോര്ക്കില് നടന്ന മത്സരത്തില് റാപിഡ് കിരീടം നഷ്ടപ്പെട്ടും ബ്ലിറ്റ്സ് കിരീടം പങ്കിട്ടുമുള്ള കാര്ല്സന് ഇത്തവണ തിരിച്ചെത്തുന്നു. നിലവിലെ വേള്ഡ് റാപിഡ് ചാമ്പ്യന് വോളോദാര് മുര്സിന് നിന്നുള്ള കടുത്ത വെല്ലുവിളി അദ്ദേഹത്തിന് നേരിടേണ്ടിവരും.
ഗുകേഷിന്റെ സാന്നിധ്യവും വലിയ ആകര്ഷണമാണ്. ഈ വര്ഷം സാഗ്രെബില് ഉള്പ്പെടെ നടത്തിയ മികച്ച പ്രകടനങ്ങള് റാപിഡ് മത്സരത്തില് അദ്ദേഹത്തെ മുന്നിര കിരീടാവകാശികളില് ഒരാളാക്കി.
വനിതാ ചാമ്പ്യന്ഷിപ്പുകളും അതേ നിലവാരം വാഗ്ദാനം ചെയ്യുന്നു. വനിതാ ലോക ചാമ്പ്യന് ജു വെന്ജുന് നേതൃത്വം നല്കുന്ന മത്സരത്തില് 130 താരങ്ങള് പങ്കെടുക്കും. ഷു ജിനര്, ലൈ ടിങ്ജി, അലെക്സാണ്ട്ര ഗൊര്യാച്ച്കിന, ഹമ്പി കൊനേരു തുടങ്ങിയ പ്രമുഖരും പങ്കെടുക്കുന്നുണ്ട്.
