ദോഹ: ഖത്തറിന്റെ ബാങ്കിംഗ് മേഖല ശക്തമായ വളര്ച്ച കൈവരിച്ചു. 2025 നവംബറില് മൊത്തം ആസ്തികള് മാസാന്തര അടിസ്ഥാനത്തില് ഒരു ശതമാനം വര്ധിച്ച് 2.148 ട്രില്യണ് റിയാലിലെത്തിയതായി കണക്കുകള് വ്യക്തമാക്കുന്നു.
2025 നവംബറില് മൊത്തം ആസ്തികള് 5 ശതമാനം വളര്ച്ച രേഖപ്പെടുത്തിയപ്പോള് 2023- 2024 കാലയളവില് ഇത് 3.9 ശതമാനമായിരുന്നു. കഴിഞ്ഞ അഞ്ച് വര്ഷങ്ങളിലായി (2020- 2024) ആസ്തികള് ശരാശരി 5.7 ശതമാനം വളര്ച്ച നേടി. കഴിഞ്ഞ വര്ഷം നവംബറില് ദ്രവ ആസ്തികള് മൊത്തം ആസ്തികളുടെ 30 ശതമാനമായി ആരോഗ്യകരമായ നിലയില് നിലനിന്നതായി ക്യു എന് ബി ഫിനാന്ഷ്യല് സര്വീസസ് പുറത്തിറക്കിയ റിപ്പോര്ട്ടില് പറയുന്നു.
മാസാന്തര റിപ്പോര്ട്ട് മൊത്തം ആസ്തികള്, വായ്പകള്, നിക്ഷേപങ്ങള് എന്നിവ വിശദീകരിക്കുന്നു. ബാങ്കിംഗ് മേഖലയിലെ മൊത്തം വായ്പകള് 2025 നവംബറില് മാസാന്തര അടിസ്ഥാനത്തില് 0.5 ശതമാനം ഉയര്ന്ന് 1,435 ബില്ല്യണ് റിയാലിലെത്തി. സ്വകാര്യ മേഖലയില് നിന്നുള്ള സമതല പ്രകടനവും അന്താരാഷ്ട്ര വായ്പകളിലെ വളര്ച്ചയും മൂലം അവലോകന കാലയളവില് മൊത്തം വായ്പാ പോര്ട്ട്ഫോളിയോയില് നേരിയ വര്ധന രേഖപ്പെടുത്തി. അതേസമയം, പൊതുമേഖലാ വായ്പകള് 0.6 ശതമാനം കുറഞ്ഞു.
2025 നവംബറില് വായ്പകള് 2024 സാമ്പത്തിക വര്ഷത്തോട് താരതമ്യപ്പെടുത്തുമ്പോള് 6.6 ശതമാനം വര്ധിച്ചു. 2024-ല് ഇത് 4.6 ശതമാനമായിരുന്നു. കഴിഞ്ഞ അഞ്ച് വര്ഷങ്ങളില് (2020- 2024) വായ്പകള് ശരാശരി 5.4 ശതമാനം വളര്ച്ച രേഖപ്പെടുത്തി.
