വാഷിംഗ്ടണ്: ഖത്തര് ആഭ്യന്തര മന്ത്രിയും ആഭ്യന്തര സുരക്ഷാ സേനയുടെ (ലെഖ്വിയ) കമാന്ഡറുമായ ശൈഖ് ഖലീഫ ബിന് ഹമദ് ബിന് ഖലീഫ അല് താനി വാഷിംഗ്ടണ് ഡിസിയിലെ ഔദ്യോഗിക സന്ദര്ശന വേളയില് അമേരിക്കന് ഐക്യനാടുകളുടെ ആഭ്യന്തര സുരക്ഷാ വകുപ്പ് സെക്രട്ടറി ക്രിസ്റ്റി നോയിമുമായി കൂടിക്കാഴ്ച നടത്തി.
സുരക്ഷാ മേഖലകളില്, പ്രത്യേകിച്ച് ഇരു രാജ്യങ്ങളും തമ്മിലുള്ള വൈദഗ്ധ്യ കൈമാറ്റവും സുരക്ഷാ ഏകോപനവുമായി ബന്ധപ്പെട്ട മേഖലകളില് ഉഭയകക്ഷി സഹകരണം വര്ധിപ്പിക്കുന്നതിനുള്ള വഴികള് യോഗം ചര്ച്ച ചെയ്തു.
2026 ഫിഫ ലോകകപ്പ് തയ്യാറെടുപ്പുകള് പുരോഗമിക്കുന്ന സാഹചര്യത്തില് സുരക്ഷാ സഹകരണം ശക്തിപ്പെടുത്തുന്നതിന് ലക്ഷ്യമിട്ടുള്ള ധാരണാപത്രത്തില് ഖത്തര് ആഭ്യന്തര മന്ത്രാലയവും യു എസ് ആഭ്യന്തര സുരക്ഷാ വകുപ്പും ഒപ്പുവച്ചു.
പ്രധാന കായിക പരിപാടികളുടെ സുരക്ഷാ മേഖലയില് തന്ത്രപരമായ പങ്കാളിത്തം മുന്നോട്ട് കൊണ്ടുപോകുന്നതിനുള്ള രണ്ട് സൗഹൃദ രാജ്യങ്ങളുടെയും പ്രതിബദ്ധത ഈ സഹകരണം പ്രതിഫലിപ്പിക്കുന്നു.
