ദോഹ: വര്‍ഷങ്ങളോളം നീണ്ട യുദ്ധത്തിനൊടുവില്‍ സിറിയയുടെ ഐക്യത്തിനും പരമാധികാരത്തിനും സ്വാതന്ത്ര്യത്തിനും ജനങ്ങളുടെ രാഷ്ട്രനിര്‍മ്മാണ അഭിലാഷങ്ങള്‍ക്കും ഖത്തര്‍ എന്നും പിന്തുണ നല്‍കുന്നുണ്ടെന്ന് പ്രധാനമന്ത്രിയുടെ ഉപദേശകനും വിദേശകാര്യ മന്ത്രാലയത്തിന്റെ ഔദ്യോഗിക വക്താവുമായ ഡോ. മജീദ് ബിന്‍ മുഹമ്മദ് അല്‍ അന്‍സാരി പറഞ്ഞു. വിദേശകാര്യ മന്ത്രാലയത്തിന്റെ പ്രതിവാര വാര്‍ത്താ സമ്മേളനത്തെ അഭിസംബോധന ചെയ്യുകയായിരുന്നു അദ്ദേഹം.
സിറിയക്കാര്‍ക്ക് ആശ്വാസം നല്‍കുന്നതിന് ഖത്തര്‍ എയര്‍ ബ്രിഡ്ജ് സഹായം തുടരാന്‍ ദോഹ പ്രതിജ്ഞാബദ്ധമാണെന്ന് അദ്ദേഹം ഊന്നിപ്പറഞ്ഞു. ഖത്തര്‍ ഫണ്ട് ഫോര്‍ ഡെവലപ്മെന്റ്, ഖത്തര്‍ ചാരിറ്റി എന്നിവ ഉള്‍പ്പെടെ ഖത്തര്‍ സിറിയയ്ക്ക് ഇതുവരെ 231 ടണ്‍ സഹായം എത്തിച്ചു.
വിപ്ലവം ആരംഭിച്ചതിന് ശേഷമുള്ള ആദ്യ വാണിജ്യ വിമാനമായി ഖത്തര്‍ എയര്‍വേയ്സ് ചൊവ്വാഴ്ച സിറിയയില്‍ ഇറക്കിയതും അല്‍ അന്‍സാരി എടുത്തുപറഞ്ഞു. ചൊവ്വാഴ്ച രാവിലെ ദോഹയില്‍ നിന്ന് 200 പേരുമായി പറന്നുയര്‍ന്ന വിമാനം വാണിജ്യ വിമാനങ്ങളുടെ പരമ്പര തുടരുമെന്നും ഖത്തര്‍ എയര്‍വേയ്സ് തിങ്കള്‍, വെള്ളി, ശനി ദിവസങ്ങളില്‍ ദമാസ്‌കസിലേക്ക് ആഴ്ചയില്‍ മൂന്ന് വിമാനങ്ങള്‍ പുന:രാരംഭിക്കുമെന്നും അദ്ദേഹം കൂട്ടിച്ചേര്‍ത്തു.
സിറിയയ്ക്കെതിരായ ഉപരോധങ്ങള്‍ ലഘൂകരിക്കാനുള്ള യു എസ് ഭരണകൂടത്തിന്റെ നീക്കത്തെയും സിറിയന്‍ ജനതയ്ക്കുള്ള സഹായ വിതരണം കാര്യക്ഷമമാക്കുന്ന ഏത് നടപടിയെയും ഖത്തര്‍ അഭിനന്ദിക്കുന്നുവെന്ന് അല്‍ അന്‍സാരി പറഞ്ഞു.
സിറിയയില്‍ ഉപരോധം ശാശ്വതമായി നീക്കാന്‍ അന്താരാഷ്ട്ര സമൂഹം ശ്രമിക്കുമെന്ന് അല്‍ അന്‍സാരി പറഞ്ഞു. സിറിയയില്‍ സാധാരണ ജീവിതം പുന:രാരംഭിക്കുന്നതിന് പ്രവര്‍ത്തിക്കാനും സഹകരിക്കാനും അന്താരാഷ്ട്ര സ്ഥാപനങ്ങളോട് ആഹ്വാനം ചെയ്തു.
അതേസമയം, ഗാസ വെടിനിര്‍ത്തല്‍ ചര്‍ച്ചകള്‍ സാങ്കേതിക തലത്തില്‍ ഇപ്പോഴും തുടരുകയാണെന്ന് അല്‍ അന്‍സാരി പറഞ്ഞു. ചുറ്റുമുള്ള പ്രയാസകരമായ സാഹചര്യങ്ങള്‍ കണക്കിലെടുക്കാതെ ഈ ശ്രമങ്ങള്‍ തുടരേണ്ടതിന്റെ ആവശ്യകതയില്‍ ഖത്തറിന്റെ ശക്തമായ വിശ്വാസം ഉയര്‍ത്തിക്കാട്ടുന്നു.
എല്ലാ പാര്‍ട്ടികളെയും പ്രതിനിധീകരിക്കുന്ന പ്രതിനിധികള്‍ ദോഹയിലോ കെയ്റോയിലോ സ്ഥിരമായി യോഗം ചേരാറുണ്ടെന്ന് അല്‍ അന്‍സാരി പറഞ്ഞു. എന്നിരുന്നാലും, ചര്‍ച്ചകളില്‍ നിന്ന് സമയപരിധിയോ പ്രതീക്ഷകളോ അദ്ദേഹം നല്‍കിയില്ല. എന്തെങ്കിലും ഫലങ്ങള്‍ ഉടനടി വെളിപ്പെടുത്തുമെന്ന് പറഞ്ഞു.
പുതിയ സിറിയന്‍ ഭരണകൂടത്തിലെ വിദേശകാര്യ മന്ത്രി അസദ് അല്‍ ഷൈബാനി, പ്രതിരോധ മന്ത്രി മുര്‍ഹാഫ് അബു ഖസ്റ, ഇന്റലിജന്‍സ് സര്‍വീസ് മേധാവി അനസ് ഖത്താബ് എന്നിവരുള്‍പ്പെടെയുള്ള ഉന്നതതല സിറിയന്‍ പ്രതിനിധി സംഘം ജനുവരി അഞ്ചിന് നടത്തിയ ദോഹ സന്ദര്‍ശനത്തെ ഡോ. അല്‍ അന്‍സാരി എടുത്തുപറഞ്ഞു.
സന്ദര്‍ശനത്തിന്റെ ഭാഗമായി പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിന്‍ അബ്ദുല്‍റഹ്മാന്‍ ബിന്‍ ജാസിം അല്‍താനി, ഉപപ്രധാനമന്ത്രിയും പ്രതിരോധകാര്യ സഹമന്ത്രിയുമായ ശൈഖ് സൗദ് ബിന്‍ അബ്ദുല്‍റഹ്മാന്‍ ബിന്‍ ഹസന്‍ അല്‍താനി, ഇന്റര്‍നാഷണല്‍ കോഓപ്പറേഷന്‍ സഹമന്ത്രി മറിയം ബിന്‍ത് അലി ബിന്‍ നാസര്‍ അല്‍ മിസ്‌നാദ് എന്നിവരുമായി സംഘം കൂടിക്കാഴ്ച നടത്തി.
