മുംബൈ: മഹാരാഷ്ട്രയുടെ ഇരുപതാമത് മുഖ്യമന്ത്രിയായി ഏക്നാഥ് ഷിന്ഡെ അധികാരമേറ്റു. രാജ് ഭവനില് നടന്ന ചടങ്ങില് ഗവര്ണര് ഭഗത്സിംഗ് കോഷിയാരി സത്യവാചകം ചൊല്ലിക്കൊടുത്തു.
പ്രതിപക്ഷ നേതാവായിരുന്ന ദേവേന്ദ്ര ഫഡ്നാവിസ് ഉപമുഖ്യമന്ത്രിയായും അധികാരമേറ്റു. ഉദ്ധവ് താക്കറെ വിശ്വാസ വോട്ടെടുപ്പിന് മുമ്പേ രാജിവെച്ചതോടെയാണ് ശിവസേന വിമത നേതാവ് ഏക്നാഥ് ഷിന്ഡെ മുഖ്യമന്ത്രി സ്ഥാനത്തെത്തിയത്. ഗവര്ണര് ഭഗത്സിംഗ് കോഷിയാരിയെ കണ്ട് സര്ക്കാര് രൂപീകരണത്തിനുള്ള അവകാശവാദം ഉന്നയിച്ചതിന് പിന്നാലെയാണ് ഷിന്ഡെ മുഖ്യമന്ത്രിയാവുമെന്ന് പ്രഖ്യാപിച്ചത്.
ഉപമുഖ്യമന്ത്രി സ്ഥാനം ഏറ്റെടുക്കണമെന്ന് ബി ജെ പി കേന്ദ്ര നേതൃത്വം ആവശ്യപ്പെട്ടതിനെ തുടര്ന്നാണ് ഫഡ്നാവിസ് ഉപമുഖ്യമന്ത്രിയായി അധികാരമേറ്റത്. ബാലാസാഹേബിന്റെ ഹിന്ദുത്വയ്ക്കും തങ്ങളുടെ എം എല് എമാരുടെ മണ്ഡലങ്ങളിലെ വികസനത്തിനും വേണ്ടിയാണ് ബി ജെ പിക്കൊപ്പം സര്ക്കാരുണ്ടാക്കാനുള്ള തീരുമാനമെന്ന് ഏക്നാഥ് ഷിന്ഡെ പറഞ്ഞു.
