ദോഹ: ഈ വര്ഷം ആദ്യപാദം പിന്നിടുംമുമ്പേ വിമാന ഇന്ധന വില ഉയര്ത്തിയത് ആറു തവണ. ഇതിനകം 50 ശതമാനമാണ് വിമാന ഇന്ധനവിലയില് വര്ധനവുണ്ടായത്.
മാര്ച്ച് 16-ാം തിയ്യതി മാത്രം 18 ശതമാനമാണ് വിമാന ഇന്ധനത്തിന്റെ വിലയില് വര്ധവുണ്ടായത്. അത് പ്രകാരം ഈ ഒരൊറ്റ ദിനം മാത്രം ഒരു കിലോ ലിറ്റര് എണ്ണ വിലയിലുണ്ടായ വര്ധനവ് 17,135.63 രൂപയാണ്. ചരിത്രത്തിലെ ഏറ്റവും വലിയ വര്ധനയാണിത്.
2022ല് ആറ് തവണയായി മൊത്തം 36,643.88 വര്ധനവാണ് രേഖപ്പെടുത്തിയത്. ഈ വര്ധനവോടെ ഇന്ധന വില ഒരു കിലോ ലിറ്ററിന് 110,266.29 ആയി ഉയര്ന്നു.
റഷ്യ- യുക്രെയ്ന് യുദ്ധത്തിന്റെ പശ്ചാത്തലത്തില് എണ്ണവില 140 യു എസ് ഡോളറില് എത്തി നില്ക്കുന്ന സാഹചര്യമാണ് ഇപ്പോള്. ഇതിന് മുമ്പ് ഏറ്റവും വില ഉയര്ന്നത് 2008ലായിരുന്നു. ഇന്ധന വില 147 ഡോളര് ആയി ഉയര്ന്ന സാഹചര്യത്തില് കിലോ ലിറ്ററിന് 71,028 രൂപയായിരുന്നു രേഖപ്പെടുത്തിയത്.
ഈ വര്ധനവുകളെല്ലാം പ്രവാസികള് ഉള്പ്പെടെയുള്ള യാത്രക്കാരാണ് വഹിക്കേണ്ടി വരിക. മാര്ച്ച് 27 മുതല് സാധാരണ വിമാന സര്വ്വീസുകള് ആരംഭിക്കുമ്പോള് ടിക്കറ്റ് നിരക്ക് കുറയുമെന്ന പ്രത്യാശക്കാണ് ഇതോടെ മങ്ങലേല്ക്കുന്നത്. വിമാന യാത്രയുടെ ചിലവിന്റെ 40 ശതമാനം ഫ്യൂവല് ചാര്ജ്ജുമായി ബന്ധപ്പെട്ടതാണ്.
