ഗാസ: ഇസ്രായേലുമായി ഒപ്പുവച്ച കൈമാറ്റ കരാറിന്റെ ഭാഗമായി ശനിയാഴ്ച മൂന്ന് ഇസ്രായേലി തടവുകാരെ മോചിപ്പിക്കാന്‍ തീരുമാനിച്ചതായി ഹമാസ് പ്രഖ്യാപിച്ചു.
പേരുകള്‍ കൈമാറിയതിനുശേഷം ജീവപര്യന്തം തടവിന് ശിക്ഷിക്കപ്പെട്ട 18 ഫലസ്തീന്‍ തടവുകാര്‍, ഉയര്‍ന്ന ശിക്ഷയുള്ള 54 തടവുകാര്‍, 2023 ഒക്ടോബര്‍ 7ന് ശേഷം അറസ്റ്റിലായ ഗാസ മുനമ്പില്‍ നിന്നുള്ള 111 തടവുകാര്‍ എന്നിവരുടെ കൈമാറ്റ കരാറിന്റെ ആദ്യ ഘട്ടത്തിന്റെ ഭാഗമായി മൂന്ന് തടവുകാരെയും വിട്ടയക്കുമെന്ന് പ്രിസണേഴ്സ് ഇന്‍ഫര്‍മേഷന്‍ ഓഫീസ് അറിയിച്ചു.
ഇസ്രായേല്‍ അധിനിവേശ ജയിലുകളില്‍ നിന്ന് മോചിപ്പിക്കപ്പെടുന്ന ഫലസ്തീന്‍ തടവുകാരുടെ പേരുകളുടെ പട്ടിക മൂന്ന് ഇസ്രായേലികളെ മോചിപ്പിച്ചതിന് ശേഷം ശനിയാഴ്ച പ്രഖ്യാപിക്കുമെന്ന് പ്രതീക്ഷിക്കുന്നു.
വെടിനിര്‍ത്തല്‍ കരാറിന്റെ ചട്ടക്കൂടിനുള്ളില്‍ ഹമാസും ഇസ്രായേലും തമ്മില്‍ നടന്നുകൊണ്ടിരിക്കുന്ന കൈമാറ്റ പ്രക്രിയയുടെ ആദ്യഘട്ടത്തിലെ അഞ്ചാമത്തെ ബാച്ചിന്റെ ഭാഗമായാണ് ശനിയാഴ്ച മോചിപ്പിക്കപ്പെടുമെന്ന് പ്രതീക്ഷിക്കുന്ന മൂന്ന് ഇസ്രായേലി തടവുകാരുടെ പേരുകള്‍ ഹമാസ് പ്രഖ്യാപിച്ചത്.
ഹമാസും ഇസ്രായേലും തമ്മിലുള്ള വെടിനിര്‍ത്തല്‍ കരാര്‍ ജനുവരി 19നാണ് പ്രാബല്യത്തില്‍ വന്നത്. അതനുസരിച്ച്, ഗാസ മുനമ്പില്‍ 16 മാസമായി ഇസ്രായേല്‍ അധിനിവേശ സൈന്യം നടത്തിവന്ന രക്തരൂക്ഷിതമായ യുദ്ധം അവസാനിച്ചു.
