ദോഹ: ഇന്ത്യന്‍ കള്‍ച്ചറല്‍ സെന്റര്‍ ഈദ് ആഘോഷങ്ങളുടെ ഭാഗമായി ഗ്രാന്റ് ഈദ് ബസാര്‍ ആന്റ് മെഹന്ദി നൈറ്റ് ആരംഭിച്ചു. ഈദ് ബസാര്‍ ഇന്നും തുടരും.
ഐ സി സി അശോക ഹാളില്‍ നടക്കുന്ന ഈദ് ബസാര്‍ ഖത്തറിലെ ഇന്ത്യന്‍ അംബാസഡര്‍ വിപുല്‍ ഉദ്ഘാടനം ചെയ്തു. ഇന്ത്യന്‍ എംബസിയിലെ കൗണ്‍സിലര്‍ (ചാന്‍സറി ആന്‍ഡ് കോണ്‍സുലര്‍ മേധാവി) ഡോ. വൈഭവ് എ ടണ്ടലെ വിശിഷ്ടാതിഥിയായിരുന്നു. ഐ സി സി പ്രസിഡന്റ് എ പി മണികണ്ഠന്‍ ഈദ് ആശംസകള്‍ നേര്‍ന്നു.
ഐ സി സി ജനറല്‍ സെക്രട്ടറി എബ്രഹാം കെ ജോസഫ് സ്വാഗതം പറഞ്ഞു. ഐ സി സി ഐ ടി ആന്റ് സോഷ്യല്‍ മീഡിയ മേധാവി സന്ദീപ് രാമറെഡ്ഡി നന്ദി പറഞ്ഞു. ഐ എസ് സി പ്രസിഡന്റ് ഇ പി അബ്ദുറഹ്മാന്‍, ഐ ബി പി സി പ്രസിഡന്റ് താഹ മുഹമ്മദ്, ജനറല്‍ സെക്രട്ടറി ദീപക് ഷെട്ടി, ഐ സി ബി എഫ്, ഐ സി സി, ഐ സി ബി എഫ്, ഐ ബി പി സി, ഐ എസ് സി എന്നിവയുടെ മാനേജ്മെന്റ് കമ്മിറ്റി അംഗങ്ങള്‍ എന്നിവരുള്‍പ്പെടെ പ്രമുഖ കമ്മ്യൂണിറ്റി നേതാക്കള്‍ പരിപാടിയില്‍ പങ്കെടുത്തു.
കരകൗശല വസ്തുക്കള്‍, തുകല്‍ ഉത്പന്നങ്ങള്‍, അനുകരണ ആഭരണങ്ങള്‍, റെഡിമെയ്ഡ് ഇന്ത്യന്‍ പരമ്പരാഗത വസ്ത്രങ്ങള്‍, രുചികരമായ ഇന്ത്യന്‍ ഭക്ഷണം എന്നിവയുടെ 60ലധികം സ്റ്റാളുകള്‍ ബസാര്‍ പ്രദര്‍ശനത്തിലുണ്ട്. ഷോപ്പിംഗ് ആനന്ദങ്ങള്‍ക്ക് പുറമേ ബസാറില്‍ ലൈവ് മൈലാഞ്ചി സ്റ്റേഷനുകളുമുണ്ട്.
