ദോഹ: ഡിസംബര്‍ ഒന്‍പത് ചൊവ്വാഴ്ച മുതല്‍ ഡിസംബര്‍ 18 വരെ ഉം സലാലിലെ ദര്‍ബ് അല്‍ സായിയില്‍ 2024 ദേശീയ ദിനാഘോഷങ്ങള്‍ ആരംഭിക്കുമെന്ന് സാംസ്‌കാരിക മന്ത്രാലയം അറിയിച്ചു.
ഈ വര്‍ഷം ദര്‍ബ് അല്‍ സായിയില്‍ സാംസ്‌കാരികവും പൈതൃകപരവുമായ നിരവധി പരിപാടികള്‍ ഉള്‍പ്പെടുത്തിയിട്ടുണ്ട്. ഖത്തറി സംസ്‌കാരത്തെ പ്രതിഫലിപ്പിക്കുന്ന സജീവമായ അന്തരീക്ഷത്തിലേക്ക് കൊണ്ടുപോകാനാണ് മന്ത്രാലയം ആഗ്രഹിക്കുന്നത്. 104 പ്രവര്‍ത്തനങ്ങള്‍ ഉള്‍പ്പെടുന്ന 15 പ്രധാന ഇവന്റുകളാണ് ദേശീയ ദിനാഘോഷത്തിലുള്ളത്.
ദേശീയ ദിനാഘോഷത്തിന്റെ ഭാഗമായി പൗരന്മാരും താമസക്കാരും സന്ദര്‍ശകരും ഉള്‍പ്പെടെയുള്ള പൊതുജനങ്ങളോട് ദര്‍ബ് അല്‍ സായി സന്ദര്‍ശിക്കാനും വിവിധ വിഭാഗങ്ങള്‍ക്കും പ്രായക്കാര്‍ക്കും അനുയോജ്യമായ വിവിധ പ്രവര്‍ത്തനങ്ങളില്‍ പങ്കെടുക്കാനും അല്‍ അലി അഭ്യര്‍ത്ഥിച്ചു.
ഈ വര്‍ഷം ദര്‍ബ് അല്‍ സായിയില്‍ നിരവധി സാംസ്‌കാരിക പൈതൃക പ്രവര്‍ത്തനങ്ങളും പരിപാടികളുമാണ് സംഘടിപ്പിക്കുന്നത്.
150,000 ചതുരശ്ര മീറ്ററിലധികം വ്യാപിച്ചുകിടക്കുന്ന സ്ഥിരമായ സ്ഥലത്ത് ദര്‍ബ് അല്‍ സായി ദിവസവും ഉച്ചകഴിഞ്ഞ് മൂന്നു മുതല്‍ രാത്രി 11 വരെ പ്രവര്‍ത്തിക്കും.
80 ഷോപ്പുകള്‍, 30 റെസ്റ്റോറന്റുകള്‍, കഫേകള്‍, 5 ഫോക്ക്ലോര്‍ ഗെയിമുകള്‍ എന്നിവയുടെ പങ്കാളിത്തത്തിന് പുറമേ, സന്ദര്‍ശകര്‍ക്കും പങ്കെടുക്കുന്ന സ്ഥാപനങ്ങള്‍ക്കും സൗകര്യവും സുരക്ഷയും നല്‍കുന്ന ഉയര്‍ന്ന തലത്തിലുള്ള ഉപകരണങ്ങളും സേവനങ്ങളും സൈറ്റിന്റെ സവിശേഷതയാണ്.
