ദോഹ: ലോകകപ്പിലെ ആദ്യ പ്രീക്വാര്‍ട്ടര്‍ മത്സരത്തില്‍ അമേരിക്കയ്ക്കെതിരെ നെതര്‍ലന്‍ഡ്സിന് ജയം. ഒന്നിനെതിരെ മൂന്ന് ഗോളുകള്‍ക്കായിരുന്നു ഓറഞ്ച് പടയുടെ വിജയം.
മത്സരത്തിന്റെ പത്താം മിനുട്ടില്‍ മെംഫിസ് ഡിപേയിലൂടെ മുന്നിലെത്തിയ ഓറഞ്ച് പട കളിയുടെ ആധിപത്യം ഉറപ്പിച്ചു. ഒപ്പമെത്താന്‍ അമേരിക്ക നെതര്‍ലാന്റ്‌സിന്റെ ഗോള്‍ മുഖത്തേയ്ക്ക് അക്രമണം അഴിച്ചുവിട്ടെങ്കിലും വല ചലിപ്പിക്കാനായില്ല. യു എസ് എയെ ഞെട്ടിച്ച് ആദ്യ പകുതിയുടെ അധിക സമയത്ത് ബ്ലിന്‍ഡ് വക രണ്ടാം ഗോള്‍.
രണ്ടാം പകുതിയില്‍ തിരിച്ചുവരവിനായി അമേരിക്ക ഉണര്‍ന്നു കളിച്ചെങ്കിലും ഫലപ്രാപ്തിയില്‍ എത്താതെ പോകുകയായിരുന്നു. ഒടുവില്‍ 76-ാം മിനുട്ടില്‍ റൈറ്റ് അമേരിക്കയ്ക്കായി ആശ്വാസ ഗോള്‍ നേടി.
അമേരിക്ക ഒരു ഗോള്‍ നേടിയതോടെ നെതര്‍ലാന്റ്‌സ് വീണ്ടും ആക്രമണം അഴിച്ചുവിടുന്ന കാഴ്ച്ചയാണുണ്ടായത്. ആക്രമണങ്ങളുടെ ഫലമായി 81-ാം മിനുട്ടില്‍ ഡംഫ്രൈസ് വക മൂന്നാമത്തെ ഗുണ്ട്. ഓറഞ്ച് പട ഒന്നിനെതിരെ മൂന്ന് ഗോളിന് മുന്നിലെത്തി.
