ദോഹ: അസര്ബൈജാന് റിപ്പബ്ലിക്കും അര്മേനിയ റിപ്പബ്ലിക്കും തമ്മിലുണ്ടാക്കിയ സമാധാന കരാറിനെ ഖത്തര് സ്വാഗതം ചെയ്തു. ഇരു രാജ്യങ്ങളും സഹകരണത്തിന്റെയും വികസനത്തിന്റെയും സമൃദ്ധിയുടെയും പുതിയ ഘട്ടത്തിലേക്ക് മുന്നേറുമെന്ന് പ്രത്യാശ പ്രകടിപ്പിച്ചു.
ലോകമെമ്പാടുമുള്ള സങ്കീര്ണ്ണമായ തര്ക്കങ്ങളും സംഘര്ഷങ്ങളും പരിഹരിക്കുന്നതില് സമാധാനപരമായ മാര്ഗങ്ങളുടെ ഫലപ്രാപ്തി വീണ്ടും ഉറപ്പിച്ചു കോക്കസസ് മേഖലയിലെ സുരക്ഷയും സ്ഥിരതയും കരാര് ശക്തിപ്പെടുത്തുന്നുവെന്ന് ഖത്തര് വിദേശകാര്യ മന്ത്രാലയം പുറത്തിറക്കിയ പ്രസ്താവനയില് പറഞ്ഞു.
കൂടുതല് സമാധാനപരവും സുരക്ഷിതവും സമൃദ്ധവുമായ ഒരു ലോകം കൈവരിക്കുന്നതിനുള്ള സംഭാഷണത്തിനുള്ള വേദികള് പ്രോത്സാഹിപ്പിക്കുന്നതിന് ലക്ഷ്യമിട്ടുള്ള എല്ലാ പ്രാദേശിക, അന്തര്ദേശീയ ശ്രമങ്ങള്ക്കും ഖത്തറിന്റെ പൂര്ണ്ണ പിന്തുണ മന്ത്രാലയം ആവര്ത്തിച്ചു.
