ദോഹ: ഗാസ മുനമ്പില് വെടിനിര്ത്തല്, പ്രദേശത്ത് നിന്ന് ഇസ്രായേല് സേനയെ പിന്വലിക്കുക, തടവുകാരെ കൈമാറുക, മാനുഷിക സഹായം നല്കല്, കുടിയിറക്കപ്പെട്ടവരുടെ തിരിച്ചുവരവ് എന്നിവ ആവശ്യപ്പെട്ട് യു എന് രക്ഷാസമിതി പ്രമേയം അംഗീകരിച്ചതിനെ ഖത്തര് സ്വാഗതം ചെയ്തു. ഗാസ മുനമ്പിലെ ക്രൂരമായ യുദ്ധം അവസാനിപ്പിക്കുന്നതിനുള്ള ശരിയായ ദിശയിലേക്കുള്ള സുപ്രധാന ചുവടുവെപ്പായാണ് ഖത്തര് ഇതിനെ കണക്കാക്കുന്നത്.
ഗാസാ മുനമ്പിലെ വിനാശകരമായ മാനുഷിക സാഹചര്യവും മേഖലയില് അക്രമം വര്ധിക്കാനുള്ള സാധ്യതയും കണക്കിലെടുത്ത് കാലതാമസമോ ഒഴിപ്പിക്കലോ ഇല്ലാതെ പ്രമേയം നടപ്പാക്കാന് എല്ലാ കക്ഷികളും പ്രതിജ്ഞാബദ്ധരാകുമെന്നാണ് ഖത്തറിന്റെ പ്രതീക്ഷയെന്ന് വിദേശകാര്യ മന്ത്രാലയം പ്രസ്താവനയില് പറഞ്ഞു.
ദ്വിരാഷ്ട്ര പരിഹാരത്തെ പിന്തുണയ്ക്കുന്നതിനും രാഷ്ട്രീയ പ്രക്രിയയിലേക്കുള്ള തിരിച്ചുവരവിനുമുള്ള പ്രാദേശിക, അന്തര്ദേശീയ ശ്രമങ്ങള് ശക്തമാക്കേണ്ടതിന്റെ ആവശ്യകതയും മന്ത്രാലയം ഊന്നിപ്പറഞ്ഞു. മേഖലയില് സമഗ്രവും നീതിയുക്തവുമായ സമാധാനം കൈവരിക്കുന്നത് സ്വതന്ത്രവും സമ്പൂര്ണ പരമാധികാരമുള്ള 1967-ലെ അതിര്ത്തികളില് കിഴക്കന് ജറുസലേം തലസ്ഥാനമായി ഫലസ്തീന് രാഷ്ട്രം സ്ഥാപിക്കുന്നതിനെ അടിസ്ഥാനമാക്കിയാണെന്നും ഖത്തര് ഊന്നിപ്പറഞ്ഞു.
