ദോഹ: ഇന്ത്യന്‍ വാണിജ്യ വ്യവസായ മന്ത്രി പീയൂഷ് ഗോയലുമായി ഖത്തര്‍ വിദേശ വ്യാപാര സഹമന്ത്രി ഡോ. അഹമ്മദ് ബിന്‍ മുഹമ്മദ് അല്‍ സയ്യിദ് വീഡിയോ കോണ്‍ഫറന്‍സ് നടത്തി. സംഘര്‍ഷം മൂലമുണ്ടായ വെല്ലുവിളികളുടെ പശ്ചാത്തലത്തില്‍ ഖത്തറിന് ഇന്ത്യന്‍ വാണിജ്യ വ്യവസായ മന്ത്രി ഐക്യദാര്‍ഢ്യം പ്രകടിപ്പിച്ചു.
വിതരണ ശൃംഖലയുടെ പ്രതിരോധശേഷി ശക്തിപ്പെടുത്തുന്നതിനൊപ്പം ഇന്ത്യ- ഖത്തര്‍ ഉഭയകക്ഷി വ്യാപാര, നിക്ഷേപ ബന്ധങ്ങള്‍ കൂടുതല്‍ മെച്ചപ്പെടുത്തുന്നതിനുള്ള വഴികളിലാണ് ഇരു മന്ത്രിമാരും തമ്മിലുള്ള ചര്‍ച്ചകള്‍ കേന്ദ്രീകരിച്ചത്. വരും കാലങ്ങളില്‍ ഉഭയകക്ഷി തന്ത്രപരമായ പങ്കാളിത്തം വര്‍ധിപ്പിക്കുന്നതിനും ശക്തമാക്കുന്നതിനും ഇരുപക്ഷവും ഊന്നല്‍ നല്കി.
വ്യാപാര, വാണിജ്യ വിനിമയങ്ങള്‍ പുനഃസ്ഥാപിക്കുന്നതിനുള്ള വഴികളും മാര്‍ഗങ്ങളും പര്യവേക്ഷണം ചെയ്യുന്നതിനായി നിലവിലുള്ള സാഹചര്യത്തെയും മേഖല നേരിടുന്ന വെല്ലുവിളികളെയും കുറിച്ച് അവര്‍ ചര്‍ച്ച ചെയ്തു.
ഇരു മന്ത്രിമാരും തമ്മിലുള്ള വീഡിയോ കോണ്‍ഫറന്‍സ് ഇരു രാജ്യങ്ങളും തമ്മിലുള്ള ഉയര്‍ന്ന തലത്തിലുള്ള വിനിമയങ്ങളുടെ ആക്കം വര്‍ധിപ്പിക്കുന്നു. ഇന്ത്യയുടെ പെട്രോളിയം, പ്രകൃതിവാതക മന്ത്രി ഹര്‍ദീപ് സിംഗ് പുരി ഖത്തര്‍ സന്ദര്‍ശിച്ചപ്പോള്‍ ഖത്തര്‍ ഊര്‍ജ്ജകാര്യ സഹമന്ത്രിയുമായി കൂടിക്കാഴ്ച നടത്തിയിരുന്നു. ഖത്തറിനോടുള്ള ഇന്ത്യയുടെ ഐക്യദാര്‍ഢ്യവും ഇന്ത്യന്‍ സമൂഹത്തിന് ഖത്തര്‍ നല്‍കുന്ന നിലനില്‍ക്കുന്ന പിന്തുണയ്ക്കുള്ള നന്ദിയും അദ്ദേഹം അറിയിച്ചു.
