വാഷിങ്ടണ്: ഫിഫ ലോകകപ്പ് 2026 മത്സരങ്ങളില് ഖത്തര് ദേശീയ ടീമിനെ പിന്തുണയ്ക്കാനെത്തുന്ന ഖത്തര് ആരാധക സംഘങ്ങളെ അമേരിക്കയിലെ സാന് ഫ്രാന്സിസ്കോയില് സ്വീകരിക്കുന്നതിനുള്ള എല്ലാ ഒരുക്കങ്ങളും പൂര്ത്തിയായതായി ഖത്തര് ഫുട്ബോള് അസോസിയേഷന് മാര്ക്കറ്റിങ് ആന്ഡ് കമ്മ്യൂണിക്കേഷന്സ് ഡയറക്ടര് ഖാലിദ് മുബാറക് അല് കുവാരി അറിയിച്ചു.
ആദ്യ ഖത്തര് ആരാധക സംഘം ചൊവ്വാഴ്ച അമേരിക്കയിലെത്തുമെന്നും ശേഷിക്കുന്നവര് ബുധനാഴ്ചയും വ്യാഴാഴ്ചയും എത്തിച്ചേരുമെന്നും അദ്ദേഹം ഖത്തര് വാര്ത്താ ഏജന്സിയോട് പറഞ്ഞു.
ആരാധകരുടെ യാത്ര കൂടുതല് സുഗമമാക്കുന്നതിനും ദേശീയ ടീമിനെ പിന്തുണയ്ക്കാന് ഏറ്റവും മികച്ച സാഹചര്യം ഒരുക്കുന്നതിനുമായി ഹോട്ടല് താമസവും ഗതാഗത സൗകര്യങ്ങളും ഉള്പ്പെടെയുള്ള എല്ലാ ക്രമീകരണങ്ങളും പൂര്ത്തിയാക്കിയതായി അദ്ദേഹം വ്യക്തമാക്കി.
ആരാധകര്ക്ക് ആവശ്യമായ സഹായങ്ങള് നല്കുന്നതിനായി അവര് താമസിക്കുന്ന ഹോട്ടലുകളില് ഖത്തര് ഫുട്ബോള് അസോസിയേഷന്റെ ഹെല്പ് ഡെസ്കുകള് സജ്ജീകരിച്ചിട്ടുണ്ടെന്നും അല് കുവാരി അറിയിച്ചു.
അമേരിക്കയിലെയും കാനഡയിലെയും ഖത്തര് എംബസികള്ക്കും ലോസ് ആഞ്ചലസിലെ ഖത്തര് കോണ്സുലേറ്റ് ജനറലിനും നല്കിയ പിന്തുണയ്ക്കും സഹകരണത്തിനും അദ്ദേഹം നന്ദി രേഖപ്പെടുത്തി.
അമേരിക്കയിലും കാനഡയിലും പഠിക്കുന്ന ഖത്തര്, ഗള്ഫ് രാജ്യങ്ങളിലെ വിദ്യാര്ഥികളെയും അവിടെ ചികിത്സയില് കഴിയുന്ന ഖത്തര് പൗരന്മാരുടെ അനുയായികളെയും ദേശീയ ടീമിന്റെ മത്സരങ്ങളില് പങ്കെടുക്കാന് ക്ഷണിച്ചിട്ടുണ്ടെന്നും അദ്ദേഹം പറഞ്ഞു. സാന് ഫ്രാന്സിസ്കോ, സിയാറ്റില്, വാന്കൂവര് എന്നിവിടങ്ങളിലെ അറബ് സമൂഹങ്ങളുമായും ഖത്തര് ദേശീയ ടീമായ ‘അല് അദാം’ന്റെ മത്സരങ്ങള്ക്ക് പിന്തുണ ഉറപ്പാക്കുന്നതിനായി ഏകോപനം നടത്തിയിട്ടുണ്ടെന്നും അദ്ദേഹം കൂട്ടിച്ചേര്ത്തു.
ഖത്തര് ആരാധകരെ സഹായിക്കുന്നതിനും അവര്ക്ക് മികച്ച ലോകകപ്പ് അനുഭവം ഉറപ്പാക്കുന്നതിനും ദേശീയ ടീമിന് ശക്തമായ പിന്തുണ നല്കുന്നതിനുമായി ഖത്തര് ഫുട്ബോള് അസോസിയേഷന്റെ വിവിധ വിഭാഗങ്ങള് ഏകോപിതമായി പ്രവര്ത്തിച്ചുവരികയാണെന്ന് അല് കുവാരി പറഞ്ഞു.
ദേശീയ ടീമിന്റെ ആരാധകര് താമസിക്കുന്ന ഹോട്ടലുകളിലും ഗ്രൂപ്പ് ഘട്ട മത്സരങ്ങള് നടക്കുന്ന സ്റ്റേഡിയങ്ങളിലുമായി അടുത്തിടെ പരിശോധനാ സന്ദര്ശനങ്ങള് നടത്തിയതായും അദ്ദേഹം വ്യക്തമാക്കി.
‘എല്ലാവരും ഖത്തറിനായി’ എന്ന മുദ്രാവാക്യത്തിന്റെ കീഴിലായിരിക്കും പ്രോത്സാഹന പ്രചാരണം സംഘടിപ്പിക്കുക. ദേശീയ ടീമിന് പൂര്ണ പിന്തുണ നല്കുന്നതില് ഖത്തര് ആരാധകര് മാതൃകാപരമായ പങ്കുവഹിക്കുമെന്ന പൂര്ണ വിശ്വാസമുണ്ടെന്നും അല് കുവാരി പറഞ്ഞു.
