ദോഹ: ഈദുല് ഫിത്വര് അവധിക്കാലത്ത് സര്ക്കാര് ആരോഗ്യ മേഖലയിലെ വിവിധ സ്ഥാപനങ്ങളുടെ പ്രവര്ത്തനസമയം ക്രമീകരിച്ചതായി പൊതുജനാരോഗ്യ മന്ത്രാലയം അറിയിച്ചു.
ഹമദ് മെഡിക്കല് കോര്പറേഷന് ആശുപത്രികളിലെ എല്ലാ അടിയന്തര സേവനങ്ങളും ഇന്പേഷ്യന്റ് ചികിത്സയും കൂടാതെ പീഡിയാട്രിക് എമര്ജന്സി സെന്ററുകളും 24 മണിക്കൂറും ആഴ്ചയിലെ ഏഴു ദിവസവും പ്രവര്ത്തനം തുടരുമെന്ന് മന്ത്രാലയം വ്യക്തമാക്കി. ആംബുലന്സ് സേവനവും പതിവുപോലെ 24 മണിക്കൂറും ലഭ്യമാകും.
ഖത്തര് നാഷണല് ബ്ലഡ് ഡൊണേഷന് സെന്റര് വിശുദ്ധ റമദാന് മാസത്തിലെ ശേഷിക്കുന്ന ദിവസങ്ങളില് രണ്ട് ഷിഫ്റ്റുകളിലായി ദാതാക്കളെ സ്വീകരിക്കും. രാവിലെ 8 മുതല് ഉച്ചയ്ക്ക് 1 വരെയും വൈകിട്ട് 6 മുതല് അര്ധരാത്രി 12 വരെയും പ്രവര്ത്തിക്കും. ഈദിന്റെ ആദ്യദിനത്തിലും അടുത്ത വെള്ളിയാഴ്ചയും സേവനം ഉണ്ടാകില്ല. ശനിയാഴ്ച മുതല് തിങ്കളാഴ്ച വരെ രാവിലെ 9 മുതല് രാത്രി 9 വരെ കേന്ദ്രം വീണ്ടും പ്രവര്ത്തനം ആരംഭിക്കും.
പ്രൈമറി ഹെല്ത്ത് കെയര് കോര്പറേഷന് നിയന്ത്രിക്കുന്ന 31 ആരോഗ്യകേന്ദ്രങ്ങളില് 21 എണ്ണം ഈദ് അവധിക്കാലത്ത് തുറന്നിരിക്കുമെന്ന് മന്ത്രാലയം അറിയിച്ചു. കൂടാതെ 14 ആരോഗ്യകേന്ദ്രങ്ങളില് അടിയന്തര ചികിത്സാ സേവനങ്ങളും ലഭ്യമാകും. ഇവയില് എട്ട് കേന്ദ്രങ്ങള് കുട്ടികള്ക്കായുള്ള അടിയന്തര ചികിത്സയ്ക്കായി പ്രത്യേകം സജ്ജീകരിച്ചവയാണ്.
ഈദുല് ഫിത്വര് അവധിക്കാലത്തെ സേവനങ്ങളുടെ വിശദമായ പ്രവര്ത്തനസമയം ബന്ധപ്പെട്ട ആരോഗ്യ സ്ഥാപനങ്ങള് സ്വതന്ത്രമായി പ്രഖ്യാപിക്കണമെന്ന് മന്ത്രാലയം നിര്ദേശിച്ചു.
അതേസമയം മന്ത്രാലയത്തിലെ ചില സേവന വിഭാഗങ്ങളുടെ പ്രവര്ത്തനസമയവും പ്രഖ്യാപിച്ചു. മെഡിക്കല് റിലേഷന്സ് ആന്ഡ് ട്രീറ്റ്മെന്റ് എബ്രോഡ് വകുപ്പ് മന്ത്രാലയ കെട്ടിടത്തില് രാവിലെ 9 മുതല് ഉച്ചയ്ക്ക് 12 വരെ സന്ദര്ശകരെ സ്വീകരിക്കും. ഈദിന്റെ ആദ്യദിനത്തിലും വെള്ളിയാഴ്ചയും ശനിയാഴ്ചയും സേവനം ഉണ്ടായിരിക്കില്ല.
വിമന്സ് ഹെല്ത്ത് ആന്റ് റിസര്ച്ച് സെന്ററില് പ്രവര്ത്തിക്കുന്ന നവജാത ശിശു രജിസ്ട്രേഷന് ഓഫീസ് ഈദ് അവധിക്കാലത്ത് രാവിലെ 8 മുതല് ഉച്ചയ്ക്ക് 12 വരെ പ്രവര്ത്തിക്കും. എന്നാല് ഈദിന്റെ ആദ്യദിനത്തിലും വെള്ളിയാഴ്ചയും ശനിയാഴ്ചയും സേവനം ഉണ്ടായിരിക്കില്ല.
മരണ രജിസ്ട്രേഷന് വിഭാഗം യൂണിഫൈഡ് ഹ്യുമാനിറ്റേറിയന് സര്വീസസ് ഓഫിസില് ദിവസേന രാവിലെ 8 മുതല് ഉച്ചയ്ക്ക് 12 വരെ സന്ദര്ശകരെ സ്വീകരിക്കും.
അതിനുപുറമെ, ഏകീകൃത ഹെല്ത്ത്കെയര് സെക്ടര് കോണ്ടാക്റ്റ് സെന്റര് (16000) ഈദ് അവധിക്കാലം മുഴുവന് 24 മണിക്കൂറും ആഴ്ചയിലെ ഏഴു ദിവസവും പ്രവര്ത്തിച്ചുകൊണ്ടിരിക്കുമെന്ന് മന്ത്രാലയം അറിയിച്ചു.
