ദോഹ: ഇന്ത്യന് കള്ച്ചറല് സെന്റര് സ്റ്റുഡന്റ്സ് ഫോറത്തിന്റെയും ഇന്ത്യ ആസ്ഥാനമായ പ്രമുഖ കരിയര് കണ്സള്ട്ടന്സിയായ കരിയര് സാര്ഥിയുടെയും സഹകരണത്തോടെ സംഘടിപ്പിച്ച ‘ഗ്ലോബല് പാത്ത്വേസ് യൂണിവേഴ്സിറ്റി കണക്ട് സീരീസ്’ വിജയകരമായി സമാപിച്ചു. ആഗോള ഉന്നത വിദ്യാഭ്യാസ രംഗത്തെ പുതിയ പ്രവണതകളെക്കുറിച്ചും ഭാവിയിലെ അക്കാദമിക് അവസരങ്ങളെക്കുറിച്ചും ഇന്ത്യന് വിദ്യാര്ഥികള്ക്കും രക്ഷിതാക്കള്ക്കും വ്യക്തമായ മാര്ഗനിര്ദേശം നല്കുകയെന്ന ലക്ഷ്യത്തോടെ നാല് ഭാഗങ്ങളിലായി വെബിനാര് പരമ്പരയാണ് സംഘടിപ്പിച്ചത്.
പരമ്പരയിലെ ഓരോ സെഷനിലും 400 മുതല് 450 വരെ വിദ്യാര്ഥികളും രക്ഷിതാക്കളും അധ്യാപകരും പങ്കെടുത്തു. പ്രമുഖ സര്വകലാശാലകളിലെ അഡ്മിഷന് വിദഗ്ധര്, വിദ്യാഭ്യാസ വിദഗ്ധര്, കരിയര് സ്ട്രാറ്റജിസ്റ്റുകള് എന്നിവരുമായി നേരിട്ട് സംവദിക്കാനുള്ള അവസരവും പങ്കെടുത്തവര്ക്ക് ലഭിച്ചു.
മാര്ക്കുകള്ക്ക് മാത്രം പ്രാധാന്യം നല്കുന്ന പരമ്പരാഗത സമീപനത്തില് നിന്ന് മാറി ജിജ്ഞാസ, കഴിവ്, നവീകരണ ചിന്ത, നേതൃത്വഗുണം, സര്ഗാത്മകത, യഥാര്ഥ ജീവിതത്തിലെ സംഭാവനകള് എന്നിവയ്ക്ക് കൂടുതല് പ്രാധാന്യം നല്കുന്ന സമഗ്രമായ വിലയിരുത്തല് രീതിയിലേക്കാണ് ആഗോള സര്വകലാശാലകള് മാറുന്നതെന്ന സന്ദേശമാണ് വെബിനാര് പരമ്പര പ്രധാനമായും മുന്നോട്ടുവെച്ചത്.
ഐ ഐ എം ഇന്ഡോര്, ഐ ഐ ടി മുംബൈ, ബിറ്റ്സ് ഡിസൈന് സ്കൂള്, അശോക യൂണിവേഴ്സിറ്റി, ക്രൈസ്റ്റ് യൂണിവേഴ്സിറ്റി, പ്ലാക്ഷ യൂണിവേഴ്സിറ്റി, എസ് പി ജെയിന് ഗ്ലോബല്, എന് എം ഐ എം എസ്, ഫ്െളയിം യൂണിവേഴ്സിറ്റി, ശിവ് നാടാര് യൂണിവേഴ്സിറ്റി തുടങ്ങിയ പ്രമുഖ വിദ്യാഭ്യാസ സ്ഥാപനങ്ങളിലെ പ്രതിനിധികളും കരിയര് സാര്ഥി, എ പി ഗുരു, ഫ്യൂച്ചുറോവൈസ്, ഇന്നോവിക്, വണ്യങ് ഇന്ത്യ തുടങ്ങിയ വിദ്യാഭ്യാസ സംഘടനകളിലെ വിദഗ്ധരും വെബിനാറില് പങ്കെടുത്തു.
അഡ്മിഷന് തന്ത്രങ്ങള്, ഉയര്ന്നുവരുന്ന അക്കാദമിക് മേഖലകള്, ഇന്റര്ഡിസിപ്ലിനറി പഠന- തൊഴില് സാധ്യതകള്, ഭാവിക്ക് അനുയോജ്യമായ നൈപുണ്യങ്ങള് എന്നിവയെക്കുറിച്ച് വിദഗ്ധര് വിശദമായി അവതരിപ്പിച്ചു.
അതിവേഗം മാറുന്ന ലോകത്ത് തൊഴില് വിജയത്തെ എങ്ങനെ പുനര്നിര്വചിക്കാമെന്നതായിരുന്നു ഉദ്ഘാടന സെഷന്റെ പ്രമേയം. അച്ചടക്കം, കഠിനാധ്വാനം, ആത്മസമര്പ്പണം തുടങ്ങിയ പരമ്പരാഗത മൂല്യങ്ങള് ആധുനിക തൊഴില്ലോകത്തിന്റെ ആവശ്യങ്ങളുമായി സംയോജിപ്പിക്കേണ്ടതിന്റെ ആവശ്യകതയും ചര്ച്ച ചെയ്തു.
‘സ്കൂള്- കോളേജ്- ജോലി എന്ന രേഖീയമായ ജീവിതപാത പരിചയപ്പെട്ട മാതാപിതാക്കള് ഇന്ന് അനന്തസാധ്യതകളുള്ള പുതിയ ലോകത്തേക്കാണ് മക്കളെ ഒരുക്കുന്നത്. ഈ സങ്കീര്ണതയെ വ്യക്തതയാക്കി മാറ്റുക എന്നതാണ് ഞങ്ങളുടെ ദൗത്യം,’ എന്ന് കരിയര് സാര്ഥിയുടെ സ്ഥാപകയും സി ഇ ഒയുമായ ഡോ. അഞ്ജലി സരോഗി പറഞ്ഞു.
തുടര്ന്നുള്ള സെഷനുകളില് സി ബി എസ് ഇ, ഐ ബി, ഐ ജി സി എസ് ഇ ഉള്പ്പെടെയുള്ള വിവിധ വിദ്യാഭ്യാസ ബോര്ഡുകളെക്കുറിച്ചും അന്താരാഷ്ട്ര പാഠ്യപദ്ധതികളെക്കുറിച്ചും വിശദീകരിച്ചു. സൈക്കോളജിയും ഡാറ്റാ സയന്സും, ഇക്കണോമിക്സും പരിസ്ഥിതി നയങ്ങളും, ഡിസൈനും ആര്ട്ടിഫിഷ്യല് ഇന്റലിജന്സും സംയോജിപ്പിക്കുന്ന പുതിയ ഇന്റര്ഡിസിപ്ലിനറി പഠനമേഖലകളും പരിചയപ്പെടുത്തി.
പഠനത്തില് നിന്ന് ഗവേഷണം, ഇന്റേണ്ഷിപ്പ്, നവീകരണ പദ്ധതികള്, നേതൃത്വ പ്രവര്ത്തനങ്ങള്, സംരംഭകത്വം, സാമൂഹിക ഇടപെടല് എന്നിവയ്ക്ക് കൂടുതല് പ്രാധാന്യം നല്കുന്ന ആഗോള വിദ്യാഭ്യാസ പ്രവണതയെക്കുറിച്ചും വെബിനാറില് വിശദീകരിച്ചു.
അവസാന സെഷനില് വിദ്യാര്ഥികള്ക്ക് തങ്ങളുടെ താത്പര്യങ്ങള് കണ്ടെത്തി അര്ഥവത്തായ പദ്ധതികളിലൂടെ യഥാര്ഥ അക്കാദമിക് പ്രൊഫൈല് രൂപപ്പെടുത്തേണ്ടതിന്റെ പ്രാധാന്യത്തെക്കുറിച്ച് മാര്ഗനിര്ദേശം നല്കി.
ഗള്ഫ് മേഖലയിലെ ഇന്ത്യന് കുടുംബങ്ങളെ മുന്നിര്ത്തിയാണ് ഈ സംരംഭം രൂപകല്പന ചെയ്തത്. ആഗോള സര്വകലാശാലകളിലെ പുതിയ അഡ്മിഷന് പ്രവണതകളെയും മാറിവരുന്ന വിദ്യാഭ്യാസ അവസരങ്ങളെയും കുറിച്ചുള്ള അവബോധം വര്ധിപ്പിക്കുകയാണ് ലക്ഷ്യം.
സര്ഗാത്മകത, സാഹചര്യങ്ങളോട് പൊരുത്തപ്പെടാനുള്ള കഴിവ്, വ്യക്തമായ ലക്ഷ്യബോധം, പ്രശ്നപരിഹാരശേഷി എന്നിവ പ്രകടിപ്പിക്കുന്ന വിദ്യാര്ഥികളെയാണ് ഇന്ന് ആഗോള സര്വകലാശാലകള് കൂടുതലായി തേടുന്നതെന്ന് സംഘാടകര് ചൂണ്ടിക്കാട്ടി.
ഐ സി സി പ്രസിഡന്റ് എ പി മണികണ്ഠന്, വിദ്യാഭ്യാസ പ്രവര്ത്തനങ്ങളുടെ മേധാവിയും മാനേജ്മെന്റ് കമ്മിറ്റി അംഗവുമായ രാകേഷ് വാഘ്, ഐ സി സി സ്റ്റുഡന്റ്സ് ഫോറം ടീം എന്നിവര് പരിപാടിയുടെ ആസൂത്രണത്തിലും വിജയകരമായ നടത്തിപ്പിലും നിര്ണായക പങ്കുവഹിച്ചു.
ഖത്തറിലെ ഇന്ത്യന് പ്രവാസി സമൂഹം, പ്രത്യേകിച്ച് വിദ്യാര്ഥികളും രക്ഷിതാക്കളും, ഈ സംരംഭത്തെ വ്യാപകമായി പ്രശംസിച്ചു. ആഗോള വിദ്യാഭ്യാസ അവസരങ്ങളിലേക്കുള്ള പുതിയ വഴികള് തുറക്കാനും വിദ്യാര്ഥികള്ക്ക് മികച്ച മാര്ഗനിര്ദേശം നല്കാനും ഈ പരിപാടിക്ക് കഴിഞ്ഞതായി അവര് അഭിപ്രായപ്പെട്ടു.
ആദ്യ പതിപ്പിന് ലഭിച്ച മികച്ച പ്രതികരണത്തെ തുടര്ന്ന് ‘ഗ്ലോബല് പാത്ത്വേസ് യൂണിവേഴ്സിറ്റി കണക്ട് സീരീസ് പാര്ട്ട് ടു’ 2026 സെപ്റ്റംബറില് ആരംഭിക്കും. അമേരിക്ക, ബ്രിട്ടന്, കാനഡ, ഓസ്ട്രേലിയ, യൂറോപ്പ്, ഫാര് ഈസ്റ്റ് എന്നിവിടങ്ങളിലെ പ്രമുഖ സര്വകലാശാലകളിലെ അഡ്മിഷന് വിദഗ്ധര് പങ്കെടുക്കുന്ന രണ്ടാം ഘട്ടത്തില് അന്താരാഷ്ട്ര അഡ്മിഷന് നടപടിക്രമങ്ങള്, മത്സരാധിഷ്ഠിത അക്കാദമിക് പ്രൊഫൈല് രൂപീകരണം എന്നിവയെക്കുറിച്ച് കൂടുതല് ആഴത്തിലുള്ള മാര്ഗനിര്ദേശങ്ങള് നല്കും.
വിദ്യാഭ്യാസ വെബിനാര് പരമ്പര എന്നതിലുപരി, പരസ്പരം ബന്ധിപ്പിക്കപ്പെട്ട ആഗോള ലോകത്ത് അടുത്ത തലമുറയെ ഉന്നത വിദ്യാഭ്യാസത്തിനും നേതൃത്വത്തിനും സജ്ജരാക്കാനുള്ള സുപ്രധാന സംരംഭമായാണ് ഗ്ലോബല് പാത്ത്വേസ് യൂണിവേഴ്സിറ്റി കണക്ട് സീരീസ് വിലയിരുത്തപ്പെടുന്നത്. ഇവിടെ അക്കാദമിക മികവിനൊപ്പം ജിജ്ഞാസയും വ്യക്തിത്വവും കഴിവും ഒരുപോലെ നിര്ണായകമാണെന്ന സന്ദേശമാണ് പരിപാടി മുന്നോട്ടുവെച്ചത്.
