ന്യൂഡല്ഹി: ഹൈദരാബാദ് ഹൗസില് ഇന്ത്യന് പ്രധാനമന്ത്രി നരേന്ദ്ര മോഡിയുമായി ഖത്തര് അമീര് ശൈഖ് തമീം ബിന് ഹമദ് അല് താനി ഔദ്യോഗിക ചര്ച്ചകള് നടത്തി.
കൂടിക്കാഴ്ചയുടെ തുടക്കത്തില് ഇന്ത്യന് പ്രധാനമന്ത്രി നരേന്ദ്ര മോഡി ഖത്തര് അമീറിനെയും അനുഗമിക്കുന്ന പ്രതിനിധി സംഘത്തെയും സ്വാഗതം ചെയ്യുകയും സന്ദര്ശനത്തിന് നന്ദി അറിയിക്കുകയും ചെയ്തു.
ഊഷ്മളമായ സ്വാഗതത്തിനും ആതിഥ്യ മര്യാദയ്ക്കും പ്രധാനമന്ത്രിക്കും ഇന്ത്യന് സര്ക്കാരിനും ജനങ്ങള്ക്കും അമീര് നന്ദി പറഞ്ഞു, ഇരു രാജ്യങ്ങളും തമ്മിലുള്ള ചരിത്രപരമായ ബന്ധങ്ങളുടെ ആഴം ശ്രദ്ധിക്കുകയും ഖത്തറിന്റെ ഏറ്റവും പ്രധാനപ്പെട്ട സാമ്പത്തിക പങ്കാളികളില് ഒന്നാണ് ഇന്ത്യ എന്ന് ഊന്നിപ്പറയുകയും ചെയ്തു.
കൂടിയാലോചനകള് പൂര്ത്തിയാക്കുന്നതിനും ബന്ധങ്ങളെ പിന്തുണയ്ക്കുന്നതിനും മെച്ചപ്പെടുത്തുന്നതിനും വ്യാപാര വിനിമയം വര്ധിപ്പിക്കുന്നതിനും പൊതു താത്പര്യങ്ങള് കൈവരിക്കുന്നതിനുമായി പ്രവര്ത്തിക്കുന്നതിന് രണ്ടാം തവണ ഇന്ത്യ സന്ദര്ശിക്കാന് കഴിഞ്ഞതില് അമീര് സന്തോഷം പ്രകടിപ്പിച്ചു.
ഇരു രാജ്യങ്ങളും തമ്മിലുള്ള ഉഭയകക്ഷി ബന്ധങ്ങളും അവ മെച്ചപ്പെടുത്തുന്നതിനും വികസിപ്പിക്കുന്നതിനുമുള്ള വഴികളും പ്രത്യേകിച്ച് സമ്പദ്വ്യവസ്ഥ, നിക്ഷേപം, ഊര്ജ്ജം എന്നീ മേഖലകളില്, പൊതു താത്പര്യമുള്ള നിരവധി പ്രാദേശിക, അന്തര്ദേശീയ വിഷയങ്ങള് ചര്ച്ച ചെയ്തു.
ഇരു രാജ്യങ്ങളിലെയും സര്ക്കാരുകള് തമ്മിലുള്ള രണ്ട് കരാറുകളുടെ കൈമാറ്റത്തിനും അമീറും ഇന്ത്യന് പ്രധാനമന്ത്രിയും സാക്ഷ്യം വഹിച്ചു.
ഉഭയകക്ഷി തന്ത്രപരമായ പങ്കാളിത്ത ബന്ധങ്ങള് സ്ഥാപിക്കുന്നതിനുള്ള ഒരു കരാറും ഇരട്ടനികുതി ഒഴിവാക്കുന്നതിനും വരുമാന നികുതിയുമായി ബന്ധപ്പെട്ട് സാമ്പത്തിക വെട്ടിപ്പ് തടയുന്നതിനുമുള്ള മറ്റൊരു കരാറും അവര് കൈമാറി.
പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിന് അബ്ദുല്റഹ്മാന് ബിന് ജാസിം അല് താനി, അമീരി ദിവാന് മേധാവി അബ്ദുല്ല ബിന് മുഹമ്മദ് അല് ഖുലൈഫി, ഊര്ജ്ജകാര്യ സഹമന്ത്രി സാദ് ബിന് ഷെരിദ അല് കാബി, തൊഴില് മന്ത്രി ഡോ. അലി ബിന് സയീദ് അല് മാരി, കമ്മ്യൂണിക്കേഷന്സ് ആന്ഡ് ഇന്ഫര്മേഷന് ടെക്നോളജി മന്ത്രി മുഹമ്മദ് ബിന് അലി അല് മന്നായ്, വാണിജ്യ വ്യവസായ മന്ത്രി ശൈഖ് ഫൈസല് ബിന് താനി അല് താനി, അമീറിനൊപ്പമുള്ള ഔദ്യോഗിക പ്രതിനിധി സംഘത്തിലെ നിരവധി അംഗങ്ങള് തുടങ്ങിയവരാണ് ഖത്തറിന്റെ ഭാഗത്തു നിന്നും ചര്ച്ചയില് പങ്കെടുത്തത്.
ഇന്ത്യന് ഭാഗത്ത് നിന്ന് വിദേശകാര്യ മന്ത്രി ഡോ. സുബ്രഹ്മണ്യം ജയ്ശങ്കര്, വാണിജ്യ വ്യവസായ മന്ത്രി പിയൂഷ് ഗോയല്, തൊഴില്, യുവജനകാര്യ, കായിക മന്ത്രി ഡോ. മന്സുഖ് മാണ്ഡവ്യ, പെട്രോളിയം, പ്രകൃതിവാതക മന്ത്രി ഹര്ദീപ് സിംഗ് പുരി, നിരവധി മുതിര്ന്ന ഉദ്യോഗസ്ഥര് എന്നിവര് പങ്കെടുത്തു.
ഇന്ത്യന് പ്രധാനമന്ത്രി അമീറിനും പ്രതിനിധി സംഘത്തിനും ആദരസൂചകമായി ഉച്ചഭക്ഷണം ഒരുക്കി.
