ദോഹ: ലോകാരോഗ്യ സംഘടനയുടെ കിഴക്കന്‍ മെഡിറ്ററേനിയനിലെ റീജിയണല്‍ ഓഫീസ് ഖത്തര്‍ പൊതു ആരോഗ്യ മന്ത്രി ഡോ. ഹനാന്‍ മുഹമ്മദ് അല്‍ കുവാരിയെ 71-ാമത് സെഷന്റെ ചെയര്‍മാനായി തെരഞ്ഞെടുത്തു.
ജിബൂട്ടിയിലെ ആരോഗ്യമന്ത്രി ഡോ. അഹമ്മദ് റോബ്ലെഹ് അബ്ദില്ലെ, ഇറാന്‍ ആരോഗ്യ- മെഡിക്കല്‍ വിദ്യാഭ്യാസ മന്ത്രി ഡോ. മുഹമ്മദ് റെസ സഫര്‍ഗണ്ടി എന്നിവരെ വൈസ് ചെയര്‍മാരായി തെരഞ്ഞെടുത്തു.
കിഴക്കന്‍ മെഡിറ്ററേനിയന്‍ മേഖലയിലെ ആരോഗ്യം മെച്ചപ്പെടുത്തുന്നതിനും പ്രധാന ആരോഗ്യ വെല്ലുവിളികളെ അഭിമുഖീകരിക്കുന്നതിനുമുള്ള സഹകരണ ശ്രമങ്ങളുടെ പ്രാധാന്യം ഊന്നിപ്പറഞ്ഞു തന്നെ ചെയര്‍മാനായി തെരഞ്ഞെടുത്തതിന് കമ്മറ്റി അംഗങ്ങള്‍ക്ക് ഡോ. അല്‍ കുവാരി നന്ദി അറിയിച്ചു.
‘അതിര്‍ത്തികള്‍ക്കപ്പുറമുള്ള ആരോഗ്യം: പ്രവര്‍ത്തനം, പ്രവേശനം, കിഴക്കന്‍ മെഡിറ്ററേനിയന്‍ മേഖലയിലെ ഇക്വിറ്റി’ എന്ന പ്രമേയത്തിന് കീഴിലുള്ള 71-ാമത് സെഷന്റെ മീറ്റിംഗുകള്‍ക്ക് ഖത്തര്‍ ആതിഥേയത്വം വഹിക്കുന്നു. യോഗം 17 വരെ തുടരും.
22 രാജ്യങ്ങളില്‍ നിന്നുള്ള ആരോഗ്യ മന്ത്രിമാരും മുതിര്‍ന്ന ഉദ്യോഗസ്ഥരും നിരവധി അന്താരാഷ്ട്ര, പ്രാദേശിക, ദേശീയ സംഘടനകളുടെ പ്രതിനിധികളും യോഗങ്ങളില്‍ പങ്കെടുക്കുന്നു.
യോഗങ്ങളില്‍ ലോകാരോഗ്യ സംഘടനയുടെ കിഴക്കന്‍ മെഡിറ്ററേനിയന്‍ റീജിയണല്‍ ഡയറക്ടര്‍ ഡോ. ഹനാന്‍ ബാല്‍ക്കി, മുതിര്‍ന്ന ഡബ്ല്യുഎച്ച്ഒ ഉദ്യോഗസ്ഥരുമായി ചേര്‍ന്ന് അടുത്ത നാലുവര്‍ഷത്തെ ശ്രമങ്ങളെ നയിക്കുന്നതിനുള്ള പ്രാദേശിക തന്ത്രപരമായ നടപ്പാക്കല്‍ പദ്ധതി ഉള്‍പ്പെടെയുള്ളവ അവതരിപ്പിച്ചു.
