അബുദാബി: യു എ ഇയിലെ വ്യോമയാനം, ഊര്ജം, വിദ്യാഭ്യാസം തുടങ്ങിയ നിര്ണായക മേഖലകളെ ലക്ഷ്യമിട്ട് നടന്ന ഏകോപിതവും അത്യാധുനികവുമായ സൈബര് ആക്രമണങ്ങളുടെ പരമ്പര ദേശീയ സൈബര് പ്രതിരോധ സംവിധാനങ്ങള് വിജയകരമായി കണ്ടെത്തി തടഞ്ഞതായി യു എ ഇ സൈബര് സുരക്ഷാ കൗണ്സില് അറിയിച്ചു.
ആക്രമണങ്ങള് മുന്കരുതലോടെ കണ്ടെത്തി നിയന്ത്രിക്കാന് കഴിഞ്ഞതിനാല് ആക്രമികള്ക്ക് ലക്ഷ്യങ്ങള് കൈവരിക്കാനോ നിര്ണായക സംവിധാനങ്ങളുടെയും സേവനങ്ങളുടെയും പ്രവര്ത്തനം തടസ്സപ്പെടുത്താനോ സാധിച്ചില്ലെന്ന് കൗണ്സില് വ്യക്തമാക്കി.
നിരവധി ആക്രമണ രീതികളും സാങ്കേതിക വിദ്യകളും ഉപയോഗിച്ചാണ് സൈബര് ആക്രമണങ്ങള് നടത്താന് ശ്രമിച്ചതെന്ന് കൗണ്സില് അറിയിച്ചു. സംവിധാനങ്ങളിലേക്കും ഡിജിറ്റല് അടിസ്ഥാന സൗകര്യങ്ങളിലേക്കും നുഴഞ്ഞുകയറാനും അക്കൗണ്ടുകളും പ്രവര്ത്തന വിവരങ്ങളും കൈവശപ്പെടുത്താനും ലക്ഷ്യമിട്ട ശ്രമങ്ങള് ഇതില് ഉള്പ്പെടുന്നു. അതീവ സുരക്ഷ ആവശ്യമുള്ള ഡിജിറ്റല് സംവിധാനങ്ങളിലേക്ക് ഉപയോക്താക്കളെ പ്രവേശന കവാടങ്ങളാക്കുന്നതിനായി ലക്ഷ്യമിട്ട ഫിഷിങ് ആക്രമണങ്ങളും നടത്തിയിരുന്നു.
ദേശീയ സൈബര് സുരക്ഷാ സംഘങ്ങള് ഉടന് തന്നെ ഇടപെട്ട് ക്ഷുദ്രപ്രവര്ത്തനങ്ങള് കണ്ടെത്തുകയും തടയുകയും ചെയ്തു. ആക്രമണങ്ങളുടെ വഴികള് നിരീക്ഷിക്കുകയും ഇതുമായി ബന്ധപ്പെട്ട സുരക്ഷാ വീഴ്ചകളുടെ സൂചനകള് തിരിച്ചറിയുകയും ചെയ്തതായി കൗണ്സില് അറിയിച്ചു.
തുടര്ന്ന് ഭീഷണികളെ നിര്വീര്യമാക്കുന്നതിനും അവ മറ്റ് സംവിധാനങ്ങളിലേക്ക് വ്യാപിക്കുന്നത് തടയുന്നതിനുമായി ആവശ്യമായ സാങ്കേതിക നടപടികള് സ്വീകരിച്ചു.
നിര്ണായക പ്രവര്ത്തനങ്ങള്ക്ക് യാതൊരു തടസ്സവും ഉണ്ടാകുന്നതിന് മുമ്പുതന്നെ ആക്രമണങ്ങള് പൂര്ണമായി നിയന്ത്രിക്കാന് കഴിഞ്ഞതായി കൗണ്സില് വ്യക്തമാക്കി. യു എ ഇയുടെ സൈബര് പ്രതിരോധ സംവിധാനങ്ങളുടെയും തുടര്ച്ചയായ നിരീക്ഷണ സംവിധാനങ്ങളുടെയും കാര്യക്ഷമതയാണ് ഇത് വ്യക്തമാക്കുന്നതെന്നും കൗണ്സില് ചൂണ്ടിക്കാട്ടി.
വര്ധിച്ചുവരുന്ന സങ്കീര്ണമായ സൈബര് ഭീഷണികളെ നേരിടുന്നതിനും ദേശീയ സൈബര് പ്രതിരോധശേഷി കൂടുതല് ശക്തിപ്പെടുത്തുന്നതിനും രാജ്യത്തെ സുപ്രധാന മേഖലകളുടെ സുരക്ഷ ഉറപ്പാക്കുന്നതിനുമുള്ള പ്രവര്ത്തനങ്ങള് തുടരുമെന്നും യു എ ഇ സൈബര് സുരക്ഷാ കൗണ്സില് അറിയിച്ചു.
