ദോഹ: ഖത്തര്‍ ടൂറിസവും സൗദി ടൂറിസം അതോറിറ്റിയും ടൂറിസം മേഖലയില്‍ സഹകരണം ശക്തിപ്പെടുത്തുന്നതിനും സംയുക്തമായ പ്രമോഷന്‍, വിപണന പ്രവര്‍ത്തനങ്ങള്‍ വികസിപ്പിക്കുന്നതിനുമായി ധാരണാപത്രത്തില്‍ ഒപ്പുവെച്ചു. ഈ കരാറിലൂടെ രണ്ട് രാജ്യങ്ങളും പരസ്പര സഹകരണത്തെ കൂടുതല്‍ ആഴത്തില്‍ കൊണ്ടുപോകുന്നതിനാണ് ലക്ഷ്യമിടുന്നത്.
വിജിറ്റ് ഖത്തറിന്റെ ചീഫ് എക്സിക്യൂട്ടീവ് ഓഫീസര്‍ എഞ്ചിനീയര്‍ അബ്ദുലസീസ് അലി അല്‍ മൗലാവിയും സൗദി ടൂറിസം അതോറിറ്റിയുടെ സി ഇ ഒയും ബോര്‍ഡ് അംഗവുമായ ഫഹദ് ഹമിദദ്ദീനും ധാരണാപത്രത്തില്‍ ഒപ്പുവെച്ചു.
കരാറിന്റെ ഭാഗമായി ഇരുരാജ്യങ്ങളും അന്തര്‍ദേശീയ പ്രദര്‍ശനങ്ങളിലെയും കോണ്‍ഫറന്‍സുകളിലെയും സംയുക്ത പങ്കാളിത്തം, ടൂറിസം ഇവന്റുകള്‍ സംഘടിപ്പിക്കല്‍, വിപണന അവസരങ്ങള്‍ പരസ്പരം പ്രോത്സാഹിപ്പിക്കല്‍ തുടങ്ങിയ വിവിധ സംരംഭങ്ങളില്‍ സഹകരിക്കുമെന്ന് അറിയിച്ചു.
