അമ്മാന്: ജോര്ദാന് തലസ്ഥാനമായ അമ്മാനില് നടക്കുന്ന 24-ാമത് ഏഷ്യന് കേഡറ്റ്, ജൂനിയര്, അണ്ടര്-21 കരാട്ടെ ചാമ്പ്യന്ഷിപ്പില് ഖത്തറിന് സ്വര്ണമെഡല്. അണ്ടര്-21 വിഭാഗത്തിലെ 60 കിലോഗ്രാമില് താഴെയുള്ളവരുടെ ഇനത്തില് ഖത്തര് താരം അബ്ദുല്റഹ്മാന് മുസ്തഫയാണ് സ്വര്ണം നേടിയത്.
ഏഷ്യന് രാജ്യങ്ങളില് നിന്നായി 30 രാജ്യങ്ങളെ പ്രതിനിധീകരിച്ച് 350-ലേറെ പുരുഷ- വനിതാ താരങ്ങളാണ് ചാമ്പ്യന്ഷിപ്പില് പങ്കെടുക്കുന്നത്.
മത്സരത്തിലുടനീളം മികച്ച പ്രകടനം പുറത്തെടുത്താണ് അബ്ദുല്റഹ്മാന് മുസ്തഫ സ്വര്ണം സ്വന്തമാക്കിയത്. നറുക്കെടുപ്പില് ബൈ ലഭിച്ചതോടെ നേരിട്ട് ക്വാര്ട്ടര് ഫൈനലിലെത്തിയ താരം ചൈനീസ് തായ്പേയിയുടെ ഷിഹ് പോ-യുനെ 11-3ന് പരാജയപ്പെടുത്തി.
സെമിഫൈനലില് സൗദി അറേബ്യയുടെ സുല്ത്താന് അല്-മസിരിയെ 11-7ന് തോല്പ്പിച്ച മുസ്തഫ ഫൈനലില് ഇന്ത്യയുടെ വിരാജ് സൈനിയെ 4-1ന് കീഴടക്കി സ്വര്ണമെഡല് സ്വന്തമാക്കി. വിരാജ് സൈനിക്ക് വെള്ളിമെഡല് ലഭിച്ചു.
ഖത്തറിന്റെ മറ്റൊരു താരം ഹസന് മന്സൂര് യൂത്ത് വിഭാഗത്തിലെ 76 കിലോഗ്രാമിന് മുകളിലുള്ളവരുടെ ഇനത്തില് വെള്ളിമെഡല് നേടി. ഇതോടെ ചാമ്പ്യന്ഷിപ്പില് ഖത്തറിന്റെ മെഡല് നേട്ടം ഒരു സ്വര്ണവും ഒരു വെള്ളിയും ഉള്പ്പെടെ രണ്ടായി.
അണ്ടര്-21 വിഭാഗത്തിലെ 60 കിലോഗ്രാമില് താഴെയുള്ളവരുടെ ഇനത്തില് അബ്ദുല്റഹ്മാന് മുസ്തഫയും യൂത്ത് വിഭാഗത്തിലെ 76 കിലോഗ്രാമിന് മുകളിലുള്ളവരുടെ ഇനത്തില് ഹസന് മന്സൂറുമാണ് ചാമ്പ്യന്ഷിപ്പില് ഖത്തറിനെ പ്രതിനിധീകരിക്കുന്നത്. ഖത്തര് തായ്ക്വാന്ഡോ, ജൂഡോ, കരാട്ടെ ഫെഡറേഷന്റെ അസിസ്റ്റന്റ് സെക്രട്ടറി ജനറല് റാഷിദ് അല്- ഹജ്രിയാണ് സംഘത്തെ നയിക്കുന്നത്.
കേഡറ്റ്, ജൂനിയര്, അണ്ടര്-21 വിഭാഗങ്ങളിലെ കത്ത, കുമിത്തെ മത്സരങ്ങളാണ് 24-ാമത് ഏഷ്യന് കരാട്ടെ ചാമ്പ്യന്ഷിപ്പില് നടക്കുന്നത്. പ്രായവിഭാഗങ്ങളിലെ ഏഷ്യയിലെ പ്രധാന കരാട്ടെ മത്സരങ്ങളിലൊന്നായ ചാമ്പ്യന്ഷിപ്പില് വിവിധ രാജ്യങ്ങളില് നിന്നുള്ള താരങ്ങളുടെ വലിയ പങ്കാളിത്തമാണുള്ളത്.
