ദോഹ: ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍താനിയും ബ്രിട്ടീഷ് പ്രധാനമന്ത്രി ആന്‍ഡി ബേണ്‍ഹാമും ഇരു രാജ്യങ്ങളും തമ്മിലുള്ള ഉഭയകക്ഷി ബന്ധവും വിവിധ മേഖലകളിലെ സഹകരണം ശക്തിപ്പെടുത്തുന്നതിനുള്ള മാര്‍ഗങ്ങളും ചര്‍ച്ച ചെയ്തു.
ബ്രിട്ടീഷ് പ്രധാനമന്ത്രി നടത്തിയ ടെലിഫോണ്‍ സംഭാഷണത്തിലാണ് അമീറുമായി വിവിധ വിഷയങ്ങള്‍ ചര്‍ച്ച ചെയ്തത്.
പ്രാദേശികവും അന്തര്‍ദേശീയവുമായ നിരവധി വിഷയങ്ങളില്‍ ഇരുവരും അഭിപ്രായങ്ങള്‍ കൈമാറി. ഫലസ്തീന്‍ വിഷയത്തിലെ പുതിയ സംഭവവികാസങ്ങളും ദ്വിരാഷ്ട്ര പരിഹാരത്തിന്റെ അടിസ്ഥാനത്തില്‍ നീതിപൂര്‍വവും സുസ്ഥിരവുമായ സമാധാനം കൈവരിക്കുന്നതിനുള്ള ശ്രമങ്ങളും ചര്‍ച്ചയായി.
ഹോര്‍മുസ് കടലിടുക്കിലെ സമീപകാല സംഘര്‍ഷാവസ്ഥയും അത് മേഖലയുടെ സുരക്ഷയിലും അന്തര്‍ദേശീയ സമുദ്ര ഗതാഗതത്തിലും സൃഷ്ടിക്കുന്ന പ്രത്യാഘാതങ്ങളും ഇരുവരും വിലയിരുത്തി. സംഘര്‍ഷം ലഘൂകരിക്കുന്നതിനും മേഖലയില്‍ സുരക്ഷയും സ്ഥിരതയും ഉറപ്പാക്കുന്നതിനുമായി സംഭാഷണത്തിനും നയതന്ത്രപരമായ പരിഹാരങ്ങള്‍ക്കും മുന്‍ഗണന നല്‍കേണ്ടതിന്റെ പ്രാധാന്യം ഇരുവരും ഊന്നിപ്പറഞ്ഞു.
